Viqueque, 28/04/2023. Ekipa nasionál hosi Diresaun Enjeñaria no Investimentu (DEI) Bee Timor-Leste, Empreza Públika (BTL, E.P), lori kompañia sira bá hala’o site visit ba fatin ne'ebé planeia ona atu implementa projetu Konstrusaun Fornesimentu Sistema Bee Moos no Supply & Installation Prefabricated Liner Tank, iha Postu-administrativu Uatucarbau, munisípiu Viqueque.
Atividade site visit ne'e hala’o durante loron rua, hahú hosi loron 27 to'o 28 fulan abril tinan ne'e, ho objetivu hodi lori kompañia sira ne’ebé sosa ona dokumentu projetu nian, bá observa fatin ne'ebé iha futuru sei implementa projetu sistema bee moos, atu nune'e wainhira kompañia ida ne’ebé mak manan tender ne'e, bele hatene ona fatin hirak ne’e, hodi hala’o servisu tuir dezeñu ne’ebé mak prepara ou eziste ona.
Planu ba implementasaun projetu konstrusaun sistema bee moos ne'e sei kobre suku Irabin de Baixo no suku Uani-Uma. Projetu ne'e mos, sei instala tanke rezervatóriu foun tolu no tanke hirak ne'e ho medida hodi metru kúbiki 70 (70m3), metru kúbiki 360 (360m3) no ida seluk ho medida (250m3) inklui ho ema melloramentu ba tanke ezistente ho medida metru kúbiku 85 (85m³)
Durante site visit ne'e, akompaña hosi Delegasaun Postu Sesaun Planeamentu, autoridade lokál no funsionáriu P.A Uatucarbau nian.
Orsamentu ne'ebé prevé ba projetu Konstrusaun Fornesimentu Sistema Bee Moos ne'e $ 1, 375,804.69, enkuantu fundu ba projetu Pakote Supply & Installation Prefabricated Liner Tank ho montante $ 211,079.15
Fahe ba Sosial Media:
