Díli, 04/10/2023, Hafoin kompañia implementadór halo teste bombeamentu (Pumping test) ba Emergency Project for Water Drilling Works in Capital Dili nian, liu-liu perfurasaun bee foun ne’ebé lokaliza iha sede suku Manleuana, postu-administrativu Dom Aleixo, munisípiu Díli, ba étapa datoluk, durante oras 27 nia laran no ohin iha ona rezultadu hosi Pumping test ne’ebé hatudu débitu bee hosi perfurasaun ne’e litru 12,5 pur segundu (débitu 12,5 l/s).
Tanba ne’e, hosi rezultadu refere, parte departamentu Infraestrutura BTL, E.P informa, perfurasaun foun ne’e, bele reforsa tan bee ba tanke rezervatóriu iha WTP Manleuana, hafoin fornese fila-fali ba komunidade sira, iha Manleuana.
Alende finaliza pumping test, ohin ekipa hosi Departamentu Kontrolu Kualidade no Ambiente (DCQA, sigla portugés) tun kedas ba terrenu, hodi foti amostra iha perfurasaun bee foun ne’e, atu bele halo análize ou teste fíziku, kímiku no bacteriology, hodi hatene no haree kualidade bee hosi perfurasaun refere.
Tuir planu, aban, kompañia implementadór sei mobiliza fali materiál perfurasaun bee nian ne’e, ba suku Camea, hodi kontinua halo perfurasaun foun iha fatin refere. Tanba projetu hirak ne’e, pakote ida mak Emergency Project for Water Drilling Works in Capital Dili no nia orsamentu mai hosi Fundus Infraestrutura (FI) ho montante $ 258,534.23 no ezekuta hosi kompañia Alifa Pereira Unipessoal Lda, ho durasaun tempu fulan neen.
Fahe ba Sosial Media:
