Aileu, 23/05/2024, Hafoin finaliza tiha servisu perfurasaun bee foun ne’ebé lokaliza iha aldeia Hudilaran, suku Aisirimou, postu-administrativu Aileu Villa, munisípiu Aileu. Kompañia implementadór kontinua kedas halo teste bombeamentu (pumping test), hodi bele hatene débitu bee iha perfurasaun ne’e.
Atividade pumping test ne’e, hala’o durante oras 24 no akompaña direta hosi enjeñeiru sira hosi Diresaun Enjeñaria no Investimentu (DEI) BTL, E.P nomos Koordenadór BTL, E.P munisípiu Aileu. No rezultadu hosi Pumping test ne’e hatudu, volume bee hosi perfurasaun refere, litru 10 pur segundu (volume 10 l/s).
Perfursaun rekursu bee foun ne’ebé implemta iha suku Asirimou ne’e, hodi reforsa sistema ezistente iha Mantane no sei fornese mos bee ba abitante suku Asirimou inklui fasilidade públika sira iha postu Aileu Villa, ne’ebé durante ne’e seidauk asesu ba bee moos.
Enkuantu projetu perfurasaun ne’e, nudár pakote ida mak projetu perfurasaun ba rekursu bee moos, iha postu-administrativu Atsabe, munisípiu Bobonaro no ba postu-administrativu Aileu Villa (Aisirimou), munisípiu Aileu, ho orsamentu $ 103,941.24 no ezekuta hosi kompañia H20 PUMP & POWER.
Daudaun ne’e, perfurasaun bee moos iha postu-administrativu Aileu Villa finaliza ona no iha tempu badak, kompañia implementadór sei mobiliza hikas materiál sira ba postu-administrativu Atabae, hodi kontinua halo perfurasaun bee iha postu refere.
Iha biban ne’e, tékniku hosi laboratóriu BTL, E.P nian, iha mos terrenu hodi foti amostra bee iha perfurasaun ne’e, hodi halo teste ou análize, atu hatene bacteria, iha bee ne’e rasik.
Fahe ba Sosial Media:
