Díli, 10/03/2023, Ekipa Departamentu MoI, hosi Diresaun Enjeñaria no Investimentu (DEI), Bee Timor-Leste, Empreza Públika (BTL, E.P), halo teste bombeamentu (Pumping test) ba Emergency Project for Water Drilling Works in Capital Dili nian, liu-liu perfurasaun bee iha Comoro C 1, suku Comoro, postu-administrativu Dom Aleixo, munisípiu Díli.
Objetivu hosi teste ne’e, hodi sukat constant rate ba débitu bee iha perfurasaun ne’e, hosi rezultadu pumping test ne’e, hatudu débitu bee mak litru 17.5 por segundu (17.5 lps). Alende ne’e, halo mos teste fíziku, kímiku no bacteriology hodi hatene no haree kualidade bee.
Pumping test iha perfurasaun bee Comoro C1 ne’e, hatudu rezultadu di’ak, tanba ne’e, iha tempu badak sei distribui ba tanke Golgota, hodi reforsa sistema bomba bee ne’ebé antes ne’e eziste ona, hodi fornese ba komunidade sira, iha área Comoro, Golgota, Tasi-Tolu no fatin sira seluk.
Servisu fíziku ba perfurasaun iha Comoro C1 finaliza ona, tanba ne’e, iha tempu badak tékniku/enjeñeiru hosi Kompañia ne’ebé sei akompaña mos hosi ekipa BTL, E.P sei halo estudu jeoelétriku no halo análize ba dadus estudu, Kompañia sei mobiliza mákina perfurasaun ba Manleu Bua Laran hodi halo perfurasaun iha fatin refere.
Enkuantu perfurasaun sistema bee ne’ebé sei implementa iha Manleu, Bua Laran ne’e, atu reforsa WTP Manleu, hodi fornese bee ba komunidade sira ne’ebé durante ne’e, asesu bee hosi WTP Manleu.
Enkuantu Projetu Emerjénsia ba Servisu Perfurasaun Bee iha Kapitál Díli (Emergency Project for Water Drilling Works in Capital Dili) ne’e, projetu pakote ida, ne’ebé kompostu hosi perfurasaun iha Comoro C 1, Comoro C 2, Comoro F (Fomento), Bidau Masaur, Becora (Camea Cendana) no flushing no pumping test iha Bairo-Pité, tanba ne’e kompañia sei halo perfurasaun iha fatin lima no flushing & pumping test iha fatin ida.
Orsamentu ba pakote projetu emerjénsia ne’e (Emergency Project for Water Drilling Works in Capital Dili) ne’e, mai hosi Fundus Infraestrutura ho montante $ 258,534.23 no ezekuta hosi kompañia Alifa Pereira Unipessoal Lda ho durasaun tempu fulan neen.
Fahe ba Sosial Media:
