Ermera, 14/09/2023. Iha loron 11 fulan ne’e, Jestór Infraestrutura Bee Timor-Leste, Empreza Públika (BTL, E.P) ho ekipa akompaña hosi Supervizór BTL, E.P nian ne’ebé destakadu iha postu-administrativu Letefoho, halo monitorizasaun ba Projetu Melloramentu Sistema Bee Moos, iha postu-administrativu Letefoho, munisípiu Ermera.
Atividade monitorizasaun ne'e, hodi haree besik liu tan servisu fíziku ne'ebé la'o ona iha terrenu nomos hodi hatene progresu hosi obra ne'e rasik. Iha biban ne’e, ekipa BTL, E.P mos halo inspesaun ba materiál hirak ne’ebé kompañia implementadór transporta ona ba iha terrenu, hodi prepara ba instalasaun no observa mos bee matan ne'ebé sei utiliza hodi kanaliza bee moos ba abitante sira.
Tuir observasaun iha terrenu, tékniku hosi kompañia implementadór nian halo hela servisu fíziku iha terrenu, hanesan hahú konstroi tanke bee no sei kontinua halo servisu seluk hanesan instalasaun liña transmisaun no seluk tan. Bazeia ba rezultadu monitorizasaun nian, daudaun ne’e, projetu fíziku atinji ona pursentu pursentu 25 (25%).
Enkuantu projetu ne’e, wainhira finaliza sei kobre ba postu-administrativu Letefoho, liu-liu iha suku Katrai-Kraik no suku Dukurai nomos sei fornese bee ba postu saúde, eskola no igreja.
Fahe ba Sosial Media:
