Bobonaro, 07/02/2024, iha loron 6 fulan ne’e, Jestór Infraestrutura Bee Timor-Leste, Empreza Públika (BTL, E.P) ho ekipa akompaña hosi Supervisor BTL, E.P nian ne'ebé destakadu iha postu-Administrativu Lolotoe, halo monitorizasaun ba projetu Konstrusaun Sistema Fornesimentu Bee Moos, ne’ebé implementa hela iha postu-administrativu Lolotoe, munisípiu Bobonaro.
Monitorizasaun ne'e, hodi observa direta servisu fíziku iha terrenu no atu bele hatene progresu hosi obra ne'e rasik, nune'e mos hodi bele garante kualidade projetu refere, nune'e wainhira finaliza, benefisiáriu sira bele uza ba tempu naruk.
Iha biban ne’e, ekipa BTL, E.P hamutuk ho tékniku laboratóriu hosi Ministériu Obras Públikas (MOP) munisípiu Bobonaro halo concrete slump test, hodi buka hatene proporsaun ba mistura ne’ebé loos ou di’ak, nune’e kompañia kontratór ne’ebé kaer obra ne’e bele kahur masa ou simentu bazeia ba rezultadu teste ne’ebé mak iha, hodi nune’e halo fundisaun ou cor tanke BPT 6m3 ne’e bele metin no dura ba tempu naruk
Hafoin observasaun servisu fíziku iha terrenu, Jestór Infraestrutura BTL, E.P relata, bazeia ba rezultadu monitorizasaun nian, projetu fíziku kona-bá Konstrusaun Sistema Fornesimentu Bee Moos iha Lolotoe atinji ona pursentu 68,62 (68,62%). No obra refere ezekuta hosi kompañia Tansos Unip Lda, ho durasaun fulan neen, maibé labele finaliza tuir tempu ne’ebé iha, tanba importasaun materiál hosi rai liur tarde. Maske nune’e, BTL, E.P nafatin kria liña koordenasaun ho kompañia implementadór no husu nafatin husu ba sira, atu bele finaliza obra ne’e. No fundus ne’ebé gasta ba projetu refere, hamutuk $ 172,649.82.
Projetu Konstrusaun Sistema Fornesimentu Bee Moos ne'e, wainhira finaliza, sei benefisia ba komunidade uma kain 161 ho nia populasaun 966 no sei fornese mos bee ba fasilidade públiku sira iha postu-administrativu Lolotoe.
Enkuantu projetu sistema bee moos ne’e, sei transforma ba sistema urbana, iha ne’ebé sei kanaliza direta bee ba konsumidór sira nia hela fatin inklui sei instala mos metru kontadór ba benefisiáriu uma kain ida-idak.
Fahe ba Sosial Media:
