Díli, 25/05/2023, Ekipa BTL, EP kompostu hosi Departamentu Aprovizionamentu no Diresaun Enjeñaria no Investimentu (DEI) realiza prebid meeting ho kompañia sira, kona-bá projetu Melloramentu Sistema Fornesimentu Bee Moos no Pakote Supply & Installation Prefabricated Liner Tank, ba iha Postu-administrativu Iliomar, munisípiu Lautém. Prebid meeting ne’e realiza iha salaun enkontru, edifísiu sentrál BTL, E.P, Caicoli.
Prebid meeting ne’e, hodi ko’alia kona-bá atividade ba prosesu kontinuasaun hosi site visit ne’ebé antes ne’e ekipa DEI ho kompañia sira hala’o ona iha terrenu no faze sira tuir mai, molok implementa projetu hirak ne’e, iha Iliomar.
Orsamentu ne'ebé prevé ba projetu Melloramentu Sistema Fornesimentu Bee Moos iha postu-administrativu Iliomar ne'e hamutuk $ 888,585.77 no ba projetu Pakote Supply & Installation Prefabricated Liner Tank nian $ 93,803.83. Enkuantu sistema bee refere, sei transforma ba sistema urbana, iha ne’ebé sei instala ou monta mos metru kontadór ba benefisiáriu sira. Sistema bee refere gravitasaun, nune’e sei kanaliza bee hosi bee matan úniku Irakala, hodi dada ba populasaun sira iha postu Iliomar.
Antes ne’e, iha loron 16 to’o 17 fulan maiu tinan 2023 ne’e, ekipa DEI lori ona kompañia sira ne’ebé partisipa iha prosesu tenderizasaun ne’e, bá haree direta fatin projetu konstrusaun sistema bee, fatin instalasaun kanu transmisaun no distribuisaun nomos lokál hodi hatuur ou instala tanke rezervatóriu sira, iha postu-administrativu Iliomar, atu nune’e wainhira kompañia ne’ebé mak manan tender ba projetu refere, sira bele hatene ona fatin hirak ne’e.
Enkuantu projetu Melloramentu Sistema Fornesimentu Bee Moos no Pakote Supply & Installation Prefabricated Liner Tank ne’e, sei kobre iha suku haat hanesan suku Iliomar I, suku Iliomar II, suku Ailebere no suku Fuat ho uma kain hamutuk 378 no totál populasaun 2268.
Prebid meeting no site visit ne’e, hanesan mandatória iha dokumentu konkursu ba projetu konstrusaun no melloramentu sistema fornesimentu bee moos inklui supply & instalasaun materiál sira.
Fahe ba Sosial Media:
