Díli, 17/01/2023, Ekipa BTL, EP kompostu hosi Departamentu Aprovizionamentu, Departamentu Kontrolu Kualidade no Ambiente (DCQA, sigla portugés) no Diresaun Enjeñaria no Investimentu (DEI) realiza prebid meeting ho kompañia, kona-bá projetu Melloramentu Sistema Fornesimentu Bee Moos no Supply and Installation Prefabricated Liner Tank, ba iha postu-administrativu Laleia, munisípiu Manatuto. Prebid meeting ne’e rasik, realiza iha salaun enkontru, edifísiu BTL, E.P sentrál, Caicoli.
Prebid meeting ne’e, hodi ko’alia kona-bá atividade ba prosesu kontinuasaun hosi site visit ne’ebé antes ne’e ekipa DEI ho kompañia sira hala’o ona iha terrenu no prosesu ba oin, molok implementa projetu hirak ne’e, iha Laleia.
Projetu Melloramentu Sistema Fornesimentu Bee Moos ne’e, sei benefisia ba komunidade sira, iha P.A Laleia. No sistema bee ne’e rasik, sei transforma ba sistema urbana, iha ne’ebé sei instala ou monta mos metru kontadór hamutuk unidade 750 ba uma kain sira. No sei instala mos prefabricated liner tank ho medida 409m3 unidade ida no 48m3 unidade rua.
Entretantu orsamentu ne’ebé prevé ba projetu Melloramentu Sistema Fornesimentu Bee Moos ba P.A Laleia ho montante $ 576.767,51 no fundus ba projetu Supply and Installation Prefabricated Liner Tank nian, hamutuk $ 148.379,96.
Antes ne’e, iha loron 12 to’o 13 fulan janeiru tinan ne’e, ekipa DEI lori kompañia sira ne’ebé partisipa iha prosesu tenderizasaun ne’e, bá haree ona lokalizasaun ba melloramentu sistema bee, fatin instalasaun kanu transmisaun no distribuisaun nomos lokál hodi hatuur ou instala tanke rezervatóriu, iha postu-administrativu Laleia, atu nune’e wainhira kompañia ne’ebé mak manan tender ba projetu refere, sira bele hatene ona fatin hirak ne’e.
Prebid meeting no site visit hanesan mandatória iha dokumentu konkursu ba projetu konstrusaun no melloramentu sistema fornesimentu bee moos inklui supply & instalasaun materiál sira.
Fahe ba Sosial Media:
