Díli, 01/09/2023. Diretór hosi Diresaun Enjeñaria no Investimentu (DEI), Jestora hosi Departamentu Administrasaun no Finansas (DAF) no Jestór Infraestrutura Bee Timor-Leste, Empreza Públika (BTL, E.P) ho ekipa hala’o sorumutu ho ekonomista ida, iha edifísiu sentrál BTL, E.P Caicoli, Díli.
Sorumutu ne’e hanesan planu hosi DEI nian, ne’ebé hakarak kria sesaun fahe informasaun ho péritu sira, hosi área oin-oin, hanesan área enjeñaria, ekonomia no meiu ambiente nian, nune’e péritu sira bele fahe sira nia koñesimentu iha fulan ida, dala ida ho tópiku oin-oin, atu nune’e bele hasa’e ekipa téknika sira nia koñesimentu ba asuntu hirak ne’e.
Ho nune’e, ohin hanesan sorumutu dahuluk ho ekonomista ida ne’ebé iha esperiénsia barak iha Fundu Esfraestrutura (FI) ho objetivu hodi partilla koñesimentu ou informasaun ba ekipa BTL, E.P nian, kona-bá oinsá atu halo análize ba kustu no benefísiu iha projetu infraestrutura sira, liu-liu iha setór bee nian. Alende ne’e, oinsá BTL, E.P bele halo kálkulu ba investimentu no nia retornu sira.
Durante iha sorumutu ne’e, ekonomista ne’e esplika asuntu bee ne'e ema nia direitu, tanba ne'e, projetu bee labele konsidera hanesan estrada no ponte, nune’e mos labele haree de’it ba retornu (osan) maibé presiza haree mos projetu nia benefísiu ba konsumidór sira. Liu-liu apoiu bee ba inan feto sira nomos ba ema ho defisiénsia sira. Tanba ne’e, investimentu iha bee moos ne’e, investimentu ida ne’ebé labele sukat de’it ho osan, maibé tenke haree ba nia impaktu sosiál ba ema ne’ebé mak BTL, E.P dezenvolve sistema bee moos ba.
Alende ne'e, ekipa BTL, E.P aprezenta mos projetu bee moos ne'ebé durante ne'e BTL, E.P konsege promove to'o ona iha postu-administrativu sira no iha projetu balun inaugura ona, ho nia sistema ne'ebé transforma ona ba sistema urbana, tanba kanalizasaun bee to'o ona iha populasaun ida-idak nia hela fatin inklui instala metru kontadór ba uma kain sira, ida ne'e hatudu BTL, E.P hahú liberta povu hosi postu-administrativu sira, maske foin tinan rua no atu hakat ba tinan tolu. Maske populasaun balun seidauk asesu bee, maibé BTL, E.P nafatin esforsu no kontinua tau iha planu hodi promove projetu bee iha fatin seluk nomos kapitál munisípiu sira. Ho informasaun ne'e, Ekonomista ne'e hakfodak no apresia, tanba foin rona informasaun katak iha kapitál postu-administrativu balun bee to'o ona iha abitante sira nia uma.
Fahe ba Sosial Media:
