Ainaro, 12/09/2023. Tékniku operadór Bee Timor-Leste, Empreza Públika (BTL, E.P), munisípiu Ainaro hamutuk ho tranballadór mão-de-obra kontinua halo servisu melloramentu ba rekursu bee, iha suku Manutasi, postu-administrativu Ainaro, munisípiu Ainaro.
Ekipa BTL, E.P Ainaro finaliza ona, servisu reabilitasaun iha bee matan Hutmorlau no instalasaun liña transmisaun sira. Tanba ne’e, ohin hahú instala tan liña distribuisaun bee DN 50 no PE NOD 63, iha aldeia Hatometaudo, Bauhatilau no Canudo.
Tuir relatu hosi BTL, E.P Ainaro katak, obra fíziku daudaun ne’e, atinji ona pursentu 40 (40%). Hafoin finaliza atividade instalasaun liña distribuisaun ne’e, ekipa sei kontinua ba faze sira tuir mai to’o remata. Ekipa ne’e nafatin esforsu, hodi bele finaliza lalais servisu refere iha tempu badak, nune’e bele kanaliza bee ba abitante sira iha Manutasi.
Enkuantu servisu melloramentu ba rekursu bee ne’e, wainhira finaliza, sei fornese bee ba komunidade sira iha aldeia tolu, ne’ebé perténsia ba suku Manutasi nian. No fundus ne’ebé utiliza ba servisu reabilitasaun ne’e, apoia hosi Unicef Timor-Leste.
Fahe ba Sosial Media:
