Díli, 09/04/2024, Vise-Prezidente Komisaun Ezekutiva BTL, E.P, Sr.Gustavo da Cruz, akompaña hosi Diretór DEI, Jestór RP/GIZ ho ekipa partisipa iha atividade konsultasaun públiku ho parte interesada autoridade lokál nomos komunidade sira. Atividade ne’e rasik realiza iha sede suku Bebonuk, Díli.
Atividade ne’e, hodi halo konsultasaun ho komunidade, parte relevante sira nomos autoridade lokál atu hetan rekomendasaun ou sujestaun ruma, nune’e bele tau iha konsiderasaun durante hala’o estudu nomos hosi informasaun ne’ebé hetan hosi konsultasaun ne’e, bele konklui termu referénsia (TOR), molok hakat ba DED.
Iha biban ne’e, Vise-Prezidente KE BTL, E.P hatete projetu WWTP no kanál distribuisaun esgotu ne’e, iha vantajen boot ba komunidade iha kapitál Díli, tanba maioria komunidade iha Díli konsumu bee hosi rai okos no tuir estudu indika katak bee hosi rai okos hahú kontamina ho fo’er sira, ho nune’e atu evita kestaun ida ne’e, Governu liuhosi BTL, E.P ne’ebé hetan apoiu fundu grant hosi EUA liuhosi MCC ne’ebé servisu hamutuk ho MCA-TL, I.P atu implementa projetu WWTP ne’e, iha Bebonuk ne'e, atu reduz risku ou moras kontajioza sira ne'ebé mai hosi kontaminasaun fo'er iha bee rai okos.
Ezekutivu BTL, E.P ne’e akresenta, Governu halo investimentu ida sei la lori povu ba risku ou moris aat, maibe sei lori povu ba moris di’ak. Kualker Governu iha kompromisu ida oinsá atu liberta nia povu hosi ki’ak no mukit no ki’ak no mukit ne’e mak parte ida ba bee, saneamentu no drenajen. Ho nune’e, Vise-Prezidente husu ba abitante sira ne’ebé mak partisipa iha atividade konsultasaun ne’e atu konsentra no rona didi’ak, hodi fó informasaun no bele hato’o mos dúvidas ruma ligadu ho projetu refere, nune’e bele hetan esklaresimentu hosi entidade relevante sira.
Durante iha atividade konsultasaun ne’e, tékniku no konsultór hosi Kompañia Internasionál Nicholas O'Dwyer Ltd (NOD) halo mos aprezentasaun kona-bá TOR ba Estasaun Tratamentu Bee Fo’er no Dalan Bee Fo’er nomos Ambientál nian.
Entidade ne’ebé partisipa iha konsultasaun públiku ne'e, mai hosi ANLA, I.P, SEEAS, DNRAS, BTL, E.P rasik, MCA-TL, I.P no NOD, Autoridade postu-administrativu Dom Aleixo, lideransa suku no aldeia nomos komunidade suku Bebonuk.
Fahe ba Sosial Media:
