Díli, 16/04/2024, Jestór RP/GIZ, Almeida Boavida, akompaña Official SOM partisipa iha atividade konsultasaun públiku ho parte interesada autoridade lokál nomos komunidade sira. Atividade ne’e rasik realiza iha Administrasaun Postu Administrativu Vera Cruz, Mascarinhas.
Atividade ne’e, hodi halo konsultasaun ho komunidade, parte relevante sira nomos autoridade lokál atu hetan rekomendasaun ou sujestaun ruma, nune’e bele tau iha konsiderasaun durante hala’o estudu nomos hosi informasaun ne’ebé hetan hosi konsultasaun ne’e, bele konklui termu referénsia (TOR), molok hakat ba DED.
Iha biban ne’e, Jestór RP/GIZ BTL, E.P hatete, projetu WWTP no kanál distribuisaun esgotu ne’e, iha vantajen boot ba komunidade iha kapitál Díli, tanba maioria komunidade iha Díli konsumu bee hosi rai okos no tuir estudu indika katak bee hosi rai okos hahú kontamina ho fo’er sira, ho nune’e atu evita kestaun ida ne’e, Governu liuhosi BTL, E.P ne’ebé hetan apoiu fundu grant hosi EUA liuhosi MCC ne’ebé servisu hamutuk ho MCA-TL, I.P atu implementa projetu WWTP ne’e, iha Bebonuk ne'e, atu reduz risku ou moras kontajioza sira ne'ebé mai hosi kontaminasaun fo'er iha bee rai okos.
Konsultasaun públiku ne’e, faze dá-huluk nian, hodi fahe informasaun no fó koñesimentu ba autoridade lokál sira iha Suku haat hanesan, Motael, Colmera, Villa Verde no Mascarinhas, ne’ebé projetu saneamentu integradu ne’e, sei benefisia direita ba populasaun sira, ne’ebé rezidente iha área refere.
Ekipa husi Kompañia Internasional Nicholas O’Dwyer (DON), nia ekipa iha tempu badak nia laran, sei tun ba terrenu, ba área identifikadu, hodi survey ba uma, hodi halo levantamentu dadus no hare kondisaun saneamentu nian iha kada uma kain, nune’e kompañia bele prepara dezeñu no BoQ.
Durante iha atividade konsultasaun ne’e, tékniku no konsultór hosi Kompañia Internasionál Nicholas O'Dwyer Ltd (NOD) halo mos aprezentasaun kona-bá Termu Referensia ba partisipante sira ligadu ho saneamentu integradu iha Suku Motael, Colmera, Villa Verde no Mascarinhas.
Entidade ne’ebé partisipa iha konsultasaun públiku ne'e, mai hosi ANLA, I.P, BTL, E.P rasik, MCA-TL, I.P no NOD, Autoridade postu-administrativu Vera Cruz, lideransa suku no Aldeia.
Fahe ba Sosial Media:
