Díli, 03/10/2023, Diretór hosi Diresaun Enjeñaria no Investimentu (DEI) hamutuk ho Jestór no tékniku hosi Departamentu Infraestrutura, Bee Timor-Leste, Empreza Públika (BTL, E.P) observa direta kompañia implementadór halo teste bombeamentu (Pumping test) ba Emergency Project for Water Drilling Works in Capital Dili nian, liu-liu perfurasaun bee foun ne’ebé lokaliza iha sede suku Manleuana, postu-administrativu Dom Aleixo, munisípiu Díli.
Objetivu hosi teste ne’e, hodi sukat constant rate ba débitu bee iha perfurasaun refere no nia rezultadu hosi pumping test ne’e rasik, provizoriamente seidauk iha, tanba daudaun ne’e, kompañia implementadór sei halo hela teste iha terrenu. Tanba ne’e, aban mak foin bele hatene nia rezultadu, hafoin kompleta teste, durante oras 27 nia laran.
Hafoin kompleta tiha pumping test, iha perfurasaun ne’e no iha ona rezultadu teste nian, mak faze tuir mai, ekipa BTL, E.P sei halo mos teste fíziku, kímiku no bacteriology, hodi hatene no haree kualidade bee hosi perfurasaun refere.
Enkuantu perfurasaun sistema bee iha Manleuana, Bua Laran ne’e, atu reforsa WTP Manleu, hodi fornese bee ba komunidade sira ne’ebé mak durante ne’e, asesu bee hosi WTP refere nomos sei fornese bee ba abitante sira ne’ebé hela besik iha sede suku Manleuana, inklui suku ne’e rasik.
Projetu Emerjénsia ba Servisu Perfurasaun Bee iha Kapitál Díli (Emergency Project for Water Drilling Works in Capital Dili) ne’e, projetu pakote ida, ne’ebé kompostu hosi perfurasaun iha Comoro C 1, Comoro C 2, Comoro F (Fomento), Bidau Masaur, Becora (Camea Cendana) no flushing no pumping test iha Bairo-Pité, tanba ne’e kompañia sei halo perfurasaun iha fatin lima no flushing & pumping test iha fatin ida.
Orsamentu ba pakote projetu emerjénsia ne’e (Emergency Project for Water Drilling Works in Capital Dili) ne’e, mai hosi Fundus Infraestrutura ho montante $ 258,534.23 no ezekuta hosi kompañia Alifa Pereira Unipessoal Lda ho durasaun tempu fulan neen.
Fahe ba Sosial Media:
