Díli, 29/05/2023. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P), ba Asuntu Sistema Bee, Saneamentu no Drenajen, Sr. Gustavo da Cruz akompaña hosi Jestór RP & GIS no Jestór DCQA no ekipa hala’o enkontru ho ekipa hosi Compact Development Team, Timor-Leste (CDTL-TL) no Grupu Tékniku Interministeriál (GTI). iha sala reuniaun enkontru edifísiu sentrál BTL, E.P, Caicoli, Díli.
Reuniaun ne’e, hodi koordena entre ministériu hirak ne’ebé hola parte iha Grupu Tékniku Interministeriál (GTI) no CDTL-TL hodi halo preparasaun nomos deside data ba negosiasaun ho komunidade afetada hosi projetu (Waste Water Treatment Plant-WWTP) ou Estasaun Tratamentu Bee Foer (ETAR, sigla portugés) nian, iha Bebonuk.
Hafoin enkontru koordenasaun ne’e, ekipa deside ona iha loron 5 fulan juñu tinan ne’e, sei konvida komunidade afetada hosi projetu ETAR Bebonuk nian, hodi halo negosiasaun ba sira nia rai, uma no ai-horis ne’ebé afeta direta ba projetu refere, nune’e bele atribui rai ne’e ba governu (BTL, E.P) hodi halo investimentu bai ha fatin ne’e.
Hafoin finaliza iha prosesu negosiasaun ne’e, sei kontinua hakat ba prosesu sira tuir mai mak Dezeñu Detalladu (Detailed Engineering Design-DED), molok ba faze implementasaun nian.
Enkuantu projetu Sistema Tratamentu Bee Foer (Waste Water Treatment Plant-WWTP) iha Bebonuk ne’e, finansia hosi Millennium Challenge Corporation-MCC.
Partisipa iha enkontru koordenasaun ne’e, mai hosi Diretór no tékniku sira hosi DNTP-MJ, DNTP-DGTP-MJ, DNSE-MJ, STPSC-MD-MJ, DNSE-MJ, CDT-TL no BTL, E.P rasik, enkontru ne’e, konvida mos Prezidente Autoridade Munisípiu Díli (PAM-Díli) nian, maibé okupadu o servisu seluk, nune’e ohin labele marka prezensa iha reuniaun ne’e.
Fahe ba Sosial Media:
