Díli, 17/07/2023. Vise-Prezidente Komisaun Ezekutiva (KE) Bee Timor-Leste, Empreza Púlika (BTL, E.P), ba Asuntu Sistema Bee, Saneamentu no Drenajen, Sr. Gustavo da Cruz partisipa iha enkontru koordenasaun ho MOP, Departamentu Irigasaun-MAPPF, JICA no konsultór sira, iha sala konferénsia DRBFC-MOP, Raikotu, Comoro.
Enkontru ne’e hodi aprezenta ou atualiza relatóriu mensál nian kona-bá progresu implementasaun projetu reabilitasaun ba infraestrutura sira ne’ebé hetan estragu hosi dezastre naturál ne’ebé akontese iha loron 4 fulan abril. Ba setór bee nian mak reabilitasaun ba sistema bee iha intake Bemos.
Durante iha enkontru ne’e, konsultór sira informa mos kona-bá problema ne’ebé akontese iha terrenu hanesan impedimentu hosi komunidade balun, ligadu ho fatuk boot rua ne’ebé tuir dezeñu sei sobu hodi halo konstrusaun, maibé tuir informasaun hosi komunidade ne’ebé hela besik iha fatin refere hatete katak, fatuk rua ne’e lulik. Tanba ne’e, sei pauza oitoan, atu nune’e konsultór sira sei haree fila-fali dezeñu tanba sira mos respeita ba kultura timor nian, nune'e mos sei halo koordenasaun, hodi bele aselera lalais prosesu hotu, atu nune'e labele difikulta projetu fíziku.
Daudaun ne’e, kompañia konstrutór hadi’a ona dalan hodi asesu atu bele mobiliza materiál sira bá fatin implementasaun projetu nian. Maibé ho impedimentu ne’e, sira sei rezolve uluk molok hahú obra fíziku iha terrenu.
Fahe ba Sosial Media:
