Díli, 23/05/2024. Diretór Enjeñaria no Investimentu (DEI), João da Cruz Cardoso akompaña hosi Jestór RP & GIS, Jestór Infraestrutura ho ekipa enkontru ho juventude no estudante sira hosi Uani-Uma, postu-administrativu Uatucarbau, munisípiu Viqueque, iha sala reuniaun edifísiu sentrál BTL, E.P Caicoli, Díli.
Sorumutu ne’e, hodi ko’alia kona-bá bee matan Uaibati ne’ebé sei utiliza hodi kanaliza bee ba populasaun sira, iha postu-administrativu Uatucarbau, maske bee matan refere daudaun ne’e, agrikultór sira utiliza hela hodi fornese bee ba natar.
Bazeia ba kronolojia katak, juventude no estudante sira hosi Uani-Uma, Uatucarbau preokupa atu kanaliza bee hosi bee matan Uaibati, hodi fornese ba komunidade Uatucarbau, ho razaun katak bee matan refere durante ne’e, agrikultór sira uza hodi fornese bee ba sira nia natar, nune’e wainhira uza tan bee matan ne’e hodi halo kanalizasaun bee moos, bee sei la sufisiente ba komunidade nia natar. Ho nune’e mak ohin, juventude no estudante Uani-Uma, Uatucarbau mai hasoru ekipa DEI no hakarak hetan esplikasaun detalla hosi parte BTL, E.P no Ministériu Agrikultura no Peska (MAP), molok utiliza bee matan ne’e.
Durante iha sorumutu ne’e, Diretór DEI esplika kona-bá parte téknika nian katak, BTL, E.P sei uza/foti de’it bee litru 15 por segundu (15 l/s) hosi bee matan refere, enkuantu bee iha bee matan ne’e rasik nia débitu litru 45 por segundu (45 l/s). Alen de ne’e, bee 15 l/s ne’ebé sei kanaliza hosi bee matan ne’e, sei utiliza deit hodi enxe ba tanke rezervatóriu, hafoin nakonu sei taka hikas, nune’e bee hirak ne’e, sei kontinua suli tuir nia dalan no komunidade sira sei bele utiliza fila-fali hodi fornese ba sira nia natar.
Ho esplikasaun ne’e, ekipa hosi Uani-Uma, Uatucarbau entende no laiha dúvida, maibé sira nia parte sei koordena no halo konfirmasaun ho MAP kona-bá bee matan refere wainhira kanaliza bee ba populasaun Uatucarbau, bee ne’e sei sufisiente ka lae ba agrikultór sira nia natar.
Durante enkontru ne’e, juventude no estudante Uani-Uma hetan informasaun tékniku ne’ebé detallu no intende ona servisu BTL, E.P nian kona-bá tanba sá mak foti bee husi bee matan Uaibati hodi halo kanalizasaun bee moos sistema urbana iha postu ne’e.
Nune’e mos, iha biban ne’e, juventude no estudante Uani-Uma hatete, sira sei konfirma ho MAP kona-ba asuntu ne’e no sei hato’o fila-fali informasaun mai BTL, E.P. Ikus liu, sira klarifika mos katak sira la impede projetu kanalizasaun bee moos, maibé sira prontu atu kontribui wainhira hetan ona konfirmasaun hosi MAP.
Fahe ba Sosial Media:
