Díli, 18/04/2023. Vise-Prezidente Komisaun Ezekutiva (KE) ba Asuntu Sistema Bee, Saneamentu no Drenajen Bee Timor-Leste, Empreza Públika (BTL, E.P), Sr. Gustavo da Cruz akompaña hosi ekipa Project Manager Unit (PMU) BTL, E.P nian, hala'o enkontru ho parseiru sira hosi Banku Mundiál (WB, sigla inglés), Millennium Challenge Corporation (MCC), Asian Development Bank (ADB), JICA, UNICEF, PARTISIPA/DFAT, ligadu ho projetu rua, hanesan Baucau Water Supply & Sanitation Project nomos Dili Water Supply Project. Enkontru koordenasaun ne'e, organiza hosi Banku Mundiál no realiza iha edifísiu Banku Mundiál, Lecidere.
Objetivu hosi enkontru ne'e, hodi ko'alia ou halo koordenasaun kona-bá apoiu servisu ne'ebé parseiru sira apoia ona mai BTL, E.P, nune'e hodi bele hetan informasaun hosi parseiru sira, liu-liu kona-bá kapasitasaun nomos melloramentu ba reforsa institusionál, iha ne'ebé hodi identifika atividade no estratejia sira, atu nune'e labele iha dupla implementasaun hosi parseiru sira.
Durante iha enkontru ne'e, iha mos aprezentasaun hosi parseiru sira hanesan MCC, JICA, ADB, UNICEF PARTISIPA/DFAT, Banku Mundiál. Aprezentasaun ne'e, hodi partilla informasaun kona-bá kooperasaun servisu ou partilla sira nia atividade hirak ne'ebé mak sira apoia ona ba Governu Timor-Leste (GovTL) liu-liu mai iha BTL, E.P ho ANAS, I.P, iha setór bee moos, saneamentu no drenajen, hodi nune'e labele dupla iha implementasaun nian nomos ho informasaun ne'ebé ohin partilla, bele tulun parseiru sira hodi define sira nia servisu ou apoiu, tantu sistema bee no saneamentu iha área urbana no iha área rurál sira.
Hafoin aprezentasaun kontinua kedas ho diskusaun ou komentáriu balun ligadu ho aprezentasaun hosi parseiru sira ne'e. No parte Banku Mundiál rasik apresia tebes ho informasaun ne'ebé mak parseiru sira aprezenta, tanba tuir duni sira nia espetativa no husu atu iha futuru bele nafatin realiza enkontru koordenasaun ne'ebé hanesan, hodi hatene progresu hosi servisu refere. Alende ne'e, iha mos avaliasaun ne'ebé hala'o hosi konsultór Banku Mundiál nian katak, sira identifika dezafiu ne'ebé mak BTL, E.P enfrenta no presiza tau iha planu, atu nune'e sira bele ajuda iha parte kapasitasaun nian.
Partisipa iha enkontru ne'e, mai hosi MCC, WB, JICA, ADB, UNICEF, PARTISIPA/DFAT no BTL, E.P rasik. Durante iha enkontru koordenasaun ne'e, parseiru balun partisipa via vídeo konferénsia.
Fahe ba Sosial Media:
