Díli, 02/05/2023. Diretór DOM BTL, E.P, Sr. Aleixo dos Santos, partisipa iha enkontru koordenasaun ne'ebé organiza hosi PNDS no realiza iha salaun JV Villa, Fatuhada.
Objetivu hosi enkontru ne'e, hodi halo koordenasaun entre liña ministeriál sira kona-bá sistema bee no saneamentu nomos setór sira seluk, ne'ebé PNDS implementa ona iha suku no aldeia sira, durante tinan 10 nia Laran. Alende ne'e, partilla informasaun no tau hamutuk ideia, atu nune'e iha futuru liña ministeriál hirak ne'e bele koordena di'ak liu tan, hodi dezenvolve iha setór hirak ne'e tuir planu ne'ebé mak iha.
Ligadu ho setór bee no saneamentu nian, Diretór DOM reprezenta BTL, E.P fó mos ideia katak, presiza aloka orsamentu ba parte Operasaun no Manutensaun nian nomos ba perfurasaun, atu nune'e sistema bele funsiona nafatin. Tanba durante ne'e, BTL, E.P hetan proposta barak kona-bá halo verifikasaun no proposta hirak ne'e rekomenda mos oinsá atu troka bomba foun sira ho nia operasaun no manutensaun rasik.
Tuir dadus ne'ebé iha katak, PNDS implementa ona projetu sistema bee moos no saneamentu iha área rurál hamutuk 970 ho totál orsamentu $ 22,841,942.29. Projetu hirak ne'e, implementa hahú hosi tinan 2013 to'o 2022. No projetu refere benefisia ba uma kain 141,159 ho totál populasaun 717,120. Relasiona ho sistema bee hirak ne'e, tuir planu alokasaun ba suku ida-idak ho orsamentu $ rihun 40 no hosi montante refere, pursentu 15 (15%) mak sei utiliza ba operasaun no manutensaun nian.
Durante iha reuniaun ne'e, alende ko'alia kona-bá setór bee moos no saneamentu, deskute mos kona-bá setór seluk hanesan área edukasaun nian kona-bá atu hadi'a eskola, saúde nian kona-bá padraun hodi dezeña postu klínika sira, agrikultura nian ko'alia kona-bá reabilitasaun ba irigasaun sira no SEII nian kona-bá involvimentu feto ba dezenvolvimentu iha área rurál sira.
Partisipa iha reuniaun ne'e, mai hosi reprezentante hosi Ministériu Saúde (MS), Ministériu Agrikultura no Peskas (MAP), Ministériu Edukasaun, Juventude no Desportu (MEJD), Ministériu Administrasaun Estatál (MAE), Sekretaria Estadu ba Igualdade no Inkluzaun (SEII), BTL, E.P, ANAS, I.P no PNDS rasik.
Fahe ba Sosial Media:
