Díli, 05/02/2024, iha loron 02 fulan ne’e, Jestór no ekipa hosi Departamentu Kontrolu Kualidade no Ambiente (DCQA, sigla portugés) Bee Timor-Leste, Empreza Públika (BTL, E.P) simu vizita ekipa tékniku hosi Diresaun Nasionál Ordenamentu Espasiál (DNOE), iha Estasaun Tratamentu Bee (ETA, sigla portugés), Bairo-Pité, Díli.
Vizita ne’e hodi observa direta no halo estudu ba patrimónia Estadu nian, liu-liu patrimónia esensiál sira hanesan ETA Central, hodi identifika no hatene kondisaun inklui servisu sira ne’ebé mak BTL, E.P fornese ba públiku liuhosi abanstesimentu bee moos. Tanba ne’e, ekipa tékniku DNOE hakarak hatene informasaun kona-bá sistema bee iha munisípiu Díli, nune’e hodi submete ba iha planu ordenamentu territorial.
Iha biban ne’e, Jestór no ekipa téknika BTL, E.P esplika mos servisu ekipa DCQA nian, oinsá halo tratamentu bee iha estasaun sira ne’ebé eziste iha kapitál Díli nomos munisípiu sira.
Ekipa BTL, E.P informa mos kona-bá komunidade balun ne’ebé kontinua okupa patrimónia BTL, E.P nian, hanesan hela iha aredór ETA no BTL, E.P preokupa, tanba prosesu tratamentu bee uza aimoruk kímiku, nune’e wainhira komunidade hela besik iha fatin ne’e, bele fó impaktu ba sira nia saúde. Alende ne’e, ekipa BTL, E.P konsidera, ETA hanesan fatin ne’ebé sensitive tebes, nune’e komunidade ou ema ne’ebé la’ós tékniku BTL, E.P nian, labele asesu ba fatin refere.
Fahe ba Sosial Media:
