Díli, 16/05/2025. Prezidente Komisaun Ezekutiva (KE) Bee Timor-Leste Empreza Públika (BTL, E.P), Sr. Gustavo da Cruz, akompaña hosi Diretór DAF enkontru ho ekipa hosi parseiru JICA, iha sala reuniaun Ezekutivu BTL, E.P, Caicoli.
Reuniaun ne’e, hodi aprezenta rezultadu avaliasaun liga ba implementasaun sistema dijitalizasaun ho naran Information Management System (IMS)-Enterprise Resource Planning (ERP) iha BTL, E.P no hato’o rekomendasaun lubuk ida atu hadi'a liu tan planu implementasaun sistema bee iha TL
Durante iha avaliasaun ne'e, ekipa detekta pontu krusiál hanesan, sistema finansiál, komersiál no operasionál ne’ebé iha ligasaun importante tebes, hodi fó solusaun di’ak ba oinsá atu hasa’e reseitas, reduz bee ne’ebé laiha valór ekonómiku/ non-revenue water no hadi’a sistema kliente nian inklui sistema pagamentu nian.
Iha enkontru ne’e, sira mos rekomenda atu kontrola, identifika no hadi’a sistema kanalizasaun sira ne’ebé estragu, nune’e bee labele sulin estraga, hodi aumenta presaun bee ba kliente sira, atu nune’e bele hasa’e reseitas.
Hosi rezultadu avaliasaun sira ne'ebé hato’o hosi JICA, BTL, E.P rekoñese, maske iha dezafiu lubuk ida ne’ebé mak sai barreira, hodi fó solusaun kestaun refere, maibé BTL, E.P anota no tau iha konsiderasaun ba rekomendasaun sira. Tanba ne’e, balun mak daudan ne’e, BTL, E.P hahú halo ona melloramentu sistema bee iha suku balun, iha kapitál Díli. Maibé atu bele koresponde hotu ba sira-nia rekomendasaun hirak ne’e, presiza liuhosi investimentu ba sistema bee.
Ezekutivu BTL, E.P hatete, liga ba investimentu sistema bee ba kapitál Díli nian, prosesu la’o hela, hein katak iha renegosiasaun ba fundus empréstimu ba implementasaun projetu sistema bee iha Díli ne’e bele realiza, nune’e iha futuru, bele responde ba rekomendasaun sira ne’e.
Fahe ba Sosial Media:
