Viqueque, 29/11/2022, Ekipa Bee Timor-Leste, Empreza Públika (BTL, E.P) munisípiu Viqueque hamutuk ho traballadór MdO identifika kanu distribuisaun bee DN 63mm mota lori kuaze metru 300, iha postu-administrativu Viqueque Villa, munisípiu Viqueque.
Tuir informasaun hosi BTL, E.P munisípiu Viqueque katak, estragus ne’e kauza hosi udan boot iha loron 27-28 fulan ne’e, hodi provoka mota boot, nune’e hodi estraga ou lori kanu distribuisaun ne’ebé instala liuhosi mota refere.
Ho estragus ne’e, afeta direta ba komunidade aldeia rua, iha suku Caraubalo, hanesan aldeia Lamak-laran no Hasbaut, provizoriamente labele asesu ba bee moos, tamba kanu distribuisaun ne’ebé durante fornese bee ba komunidade refere, mota boot sobu no kanu balun mos mota lori.
Hafoin identifikasaun, kanu barak mak mota lori no tékniku sira konsege hetan kanu balun de’it, iha imajen hatudu katak, tékniku sira rekolla no hadi’a uluk kanu balun ne’ebé sei eziste, hodi hein tan materiál balun hosi BTL, E.P nasionál, mak foin bele kompleta manutensaun.
Daudaun ne’e, BTL, E.P Viqueque rekiza ona kanu distribuisaun hosi nasionál, nune’e iha tempu badak sei hadi’a hikas estragus ne’e, hodi garante bee ba komunidade sira, iha aldeia rua ne’e.
Relasiona ne’e, BTL, E.P husu ba komunidade sira, liu-liu ba abitante aldeia rua Lamak-laran no Hasbaut, atu kolabora no pasiénsia hodi hein atividade manutensaun ne’e, hafoin finaliza mak foin bele distribui hikas bee.
Fahe ba Sosial Media:
