Díli, 08/02/2024. Vise-Prezidente Komisaun Ezekutiva Bee Timor-Leste, Empreza Públika (BTL, E.P) ba Asuntu Sistema Bee, Saneamentu no Drainajen, Sr. Gustavo da Cruz enkontru ho ekipa hosi UNICEF iha Timor-Leste, iha Vise-Prezidente nia knaar fatin, Caicoli, Díli.
Enkontru ne’e, hodi koordena no introduz kona-bá planu ou programa balun ne’ebé parseiru sira atu apoia mai iha setór bee moos no saneamentu.
Hafoin introdusaun hosi ekipa Unicef iha TL, parte BTL, E.P apresia tebes ba apoia ou programa ne’e, maibé molok foti desizaun, Vise-Prezidente KE BTL, E.P ba Asuntu Sistema Bee, Saneamentu no Drainajen solisita atu bele hetan uluk kritéria hosi implementasaun programa ne’e rasik, atu nune’e, wainhira iha nia implementasaun bele sinkroniza ho apoia nia lala’ok no tuir Doadór sira nia hakarak. Tanba ne’e, parte UNICEF sei haree no verifika rekezitu hirak ne’ebé kontempla iha proposta refere no tempu badak sei iha sorumutu entre parte rua, hodi haree hamutuk kritéria hirak ne’e.
Durante iha enkontru ne’e, parte rua (BTL, E.P ho UNICEF iha TL) deskute kona-bá programa ne’ebé parseiru sira sei apoia mai BTL, E.P, mak ida programa WASH ne’ebé sei haree liu ba área edukasaun, bee moos no sanementu ho nia fundus maihosi governu Xina liuhosi parseiru UNICEF iha TL.
Programa daruak nian, mak halo mitigasaun ou fornese asisténsia ba abitante sira ne’ebé afeta hosi El Niño, ida ne’e Fundu Sentrál ba Resposta Emerjénsia ou Central Emergency Response Fund (CERF) hosi Nasoens Unidas no sei implementa liuhosi ajénsia tolu hanesan FAO, UNICEF no WFP. No tuir planu sei implementa iha munisípiu Bobonaro, Covalima, Manufahi no Lautém ho durasaun tempu fulan neen.
No programa datoluk nian mak, planu servisu anuál UNICEF nian ba tinan 2024 ne’e, hodi implementa projetu pakote sistema bee moos ba eskola no komunidade, ne’ebé tuir planu sei implementa iha munisípiu Ainaro no Viqueque nomos konservasaun bee.
Fahe ba Sosial Media:
