Díli, 07/03/2024, Diretór Administrasaun no Finanças, Sidonio Freitas, Diretór Operasaun no Manutensaun, Aleixo dos Santos, hetan akompaña husi Jestór Departamentu Apoiu Kliente, Parte Legál BTL, E.P, kordenadora BTL, E.P munisípiu Baucau ho ekipa, hala’o atividade soslizasaun ka disemina informasaun kona-bá dekreitu lei no diploma ministeriál ba Administradór sira no direjente husi instituisaun estadu no privada, iha Salaun Administrasaun Munisipal Baucau.
Objetivu husi diseminasaun ne’e, atu partilla regras BTL, E.P, liu-liu kona-bá dekreitu lei no diploma ministeriál hanesan dekreitu lei nú. 41/2020 de 25 setembru kriasaun Bee Timor-Leste, Empreza Públika, dekreitu lei nú. 4/2004 de 11 fevereiru “ aprova rejime fornesimentu bee ba konsumu públiku “ diploma ministeriál nú. 1/2004 de 11 fevereiru “ Tabela Tarifária “ no diploma ministerial nú. 1/2009 de 5 outobru “ Fiskalizasaun Sistema Abastesimentu Bee”
Diretór Administrasaun no Finanças, Sidonio Freitas, husu ba Autoridade lokál no komunidade sira nia apoia hodi bele rezolve problema sosiál, liu-liu liga ba rai, tamba dala barak BTL, E.P implementa projetu iha postu administrativu sira, hetan impedimentu, ho nune’e Administradór hamutuk ho autoridade lokál no komunidade sira, tenki kontribui, hodi bele kanaliza bee ba populasaun.
BTL, E.P nia funsaun maka halo melloramentu ba sistema bee moos no promove projetu foun ba postu Administrativu sira, maibé husu autoridade lokál no komunidade sira nia kontribuisaun servisu hamutuk maka foin bele rezulta ba pozitivu.
Diretór Administrasaun no Finanças husu ba komunidade hirak, ne’ebé asesu ona bee husi sistema kanalizasaun, kontribui liu husi selu tarifa bee, hodi bele garante nafatin sistema nia sustentabilidade bao in.
Iha biban ne’e mos Diretór Operasaun no Manutensaun, Aleixo dos Santos, partilla informasaun relasiona ho BTL, E.P nia esforsu durante ne’e, liu-liu setór bee nian. Wainhira BTL, E.P eziste trasa politíka tau preoridade hodi dezenvolve ka promove projetu ba postu administrative sira, tamba ne’e hanesan iha munisípiu Baucau, BTL, E.P nia projetu, ne’ebé dadaun ne’e la’o iha terrenu maka iha Postu Administrativu Laga, Quelicai, Baguia, Vemasse hetan ona inaugurasaun no Venlale maka sei prosesu aprovizionamentu.
Husi politíka ne’e fazeadamente rezolve uluk postu administrativu sira, komunidade barak asesu ona bee moos, maka kontinua aspanda liu ba área seluk, ne’ebé populasaun sira sei halerik hela ba bee moos.
Partisipa iha diseminasaun ne’e maka reprezentante Prezidente Autoridade Munisípiu Baucau, Administradór Postu Administrativu sira, PNTL, Direjente husi instituisaun públiku no privada no partisipante sira seluk.
Fahe ba Sosial Media:
