Díli, 08/11/2023. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) Sr. Gustavo da Cruz simu vizita kortezia hosi Prezidente Konsellu Administrasaun Águas de Portugal (AdP) Internasionál, Sra. Carla Correia ho Vise-Prezidente AdP Internasionál, António Ventura ne’ebé akompaña mos hosi reprezentante AdP iha Timor-Leste. Durante vizita ne’e, parte rua halo mos enkontru, iha Vise-Prezidente KE BTL, E.P nia knaar fatin, Caicoli.
Vizita ne’e ho objetivu hodi kumprimenta Ezekutivu BTL, E.P no informa mos ba mudansa iha Lideransa Konsellu Administrasaun no Komisaun Ezekutivu AdP Internasionál nian. Nune'e mos, partilla hanoin ou esperiénsia balun iha setór bee no saneamentu nian.
Iha biban ne’e, AdP relata mos ezisténsia AdP nian to’o ohin loron, kompleta ona tinan tolu-nulu (30), kompara ho BTL, E.P ne’ebé foin mak tinan tolu (3), ida ne’e dook tebes. Tanba ne’e, ho esperiénsia ne’ebé mak iha, wainhira BTL, E.P presiza apoiu ba iha parte kapasitasaun nian, liu-liu iha área téknika, rekursu umanu no enjeñaria nian, mak AdP solisita atu bele servisu hamutuk iha setór bee no saneamentu.
Alende ne’e, Vise-Prezidente KE BTL, E.P esplika mos prosesu reforma institusionál hosi DGAS ba BTL, E.P harii ho kondisaun ida ne’ebé tenke forma instituisaun, tenke halo operasaun ba sistema ezisténsia sira ho tempu ne’ebé badak nomos enfrenta situasaun covid-19 no inundasaun 04 de Abril. Tanba ne’e, estabelesimentu BTL, E.P enfrenta dezafiu boot ho sistema ezistente hosi tempu Portugés no Indonézia nian no foin mak atu hahú investimentu foun. Signifika katak situasaun ida ne’e, diferente tebes entre BTL, E.P ho AdP Internasionál inklui tinan ezistente entre parte rua ne’ebé diferente tebes.
Hafoin Vise-Prezidente KE BTL, E.P relata informasaun kona-bá situasaun BTL, E.P nian, AdP Internasionál mos rekoñese katak, loos duni, ida ne’e dezafiu boot, tanba AdP rasik ultrapassa ona durante tinan 30 nia laran.
Fahe ba Sosial Media:
