Díli, 07/11/2022, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis asina kontratu ho kompañia Roman Junior Unipessoal Lda ho Soreira Unipessoal Lda kona-bá projetu konstrusaun no melloramentu fornesimentu sistema bee moos, ne’ebé sei implementa ba iha postu-administrativu Fohorem, munisípiu Covalima no iha postu-administrativu Cailaco, munisípiu Bobonaro. Seremónia asina kontratu ne’e, realiza iha salaun enkontru, edifísiu sentrál BTL, E.P, Caicoli.
Iha abertura Prezidente K.E BTL, E.P husu ba Autoridade lokál no kompañia atu responsabiliza ba kestaun ou problema ruma karik akontese iha terrenu durante implementasaun projetu fíziku la’o iha terrenu. Ezemplu wainhira projetu fíziku la’o iha terrenu mak mosu problema ne’ebé liga ba parte tékniku nian, ida ne’e kompañia ho BTL, E.P mak sei responsabiliza, maibé wainhira akontese problema sosiál, hanesan rai no ai-horis ruma, ida ne’e sei entrega ba Autoridade lokál sira mak sei rezolve, oinsa bele konvense komunidade sira nune’e sira bele kontribui atu kompañia sira bele kontinua halo servisu. Tamba populasaun sira iha postu-administrativu rua ne’e, mak sei benefisia ba projetu ne’e rasik, ho nune’e husu atu koopera, durante implementasaun projetu fíziku iha terenu.
Atu labele prejudika projetu fíziku iha terrenu, Ezekutivu solisita ba parte hotu presiza servisu hamutuk, hodi bele rezolve ou haree ba problema sira ne’ebé karik akontese iha terrenu, atu nune’e kompañia sira mos bele finaliza projetu hirak ne’e, tuir tempu ne’ebé sita ona iha kontratu.
Prezidente BTL, E.P mos agradese ba Autoridade postu-administrativu rua ne’ebé durante ne’e apoia no akompaña ona tékniku BTL, E.P nian, hodi halo levantamentu dadus tékniku, iha terrenu no ohin bele hakat selebrasaun kontratu, hodi implementa projetu refere, iha postu-administrativu Cailaco no Fohorem.
Ezekutivu ne’e mos husu ba kompañia manan na’in sira, atu kumpri regras ne’ebé esbelese ona, iha wainhira la kumpri mak kompañia sira sei hetan multa.
BTL, E.P mos sei prepara tékniku nain rua, hodi halo monitorizasaun ou akompaña kompañia sira, durante implementasaun projetu fíziku iha terrenu, atu nune’e bele garante kualidade projetu ne’e rasik, nune’e wainhira obra ne’e remata, komunidade sira bele utiliza ba tempu naruk.
Iha fatin hanesan, Administradór Post-administrativu Cailaco, Alfredo Meta Dao hatete, selebra kontratu ne’e ho kompañia atu mellora sistema bee moos iha Cailaco, atu nune’e populasaun labele kestiona bebeik ba bee moos. Administradór ne’e mos rekoñese durante ne’e komunidade sira utiliza sistema la tuir regras, maibé ho implementasaun sistema bee ne’ebé sei instala ho metru kontadór ne’e, Autoridade garante katak populasaun sira sei koopera hodi asegura bee no uza bee ho responsabilidade, nune’e labele estraga bee atu ema hotu bele hetan bee, alende ne’e, populasaun sira bele kontribui mos reseitas ba Estadu.
Alende ne’e, Diretór kompañia Roman Junior Unipessoal Lda, José Amaral hatete, sira prontu hodi implementa projetu refere ho responsabilidade, tuir dezeñu BoQ ne’ebé mak iha, nomos sei kumpri tempu ne’ebé estabelese ona.
Entretantu projetu konstrusaun sistema fornesimentu bee moos ne’e, sei implementa iha postu-administrativu Fohorem, munisípiu Covalima, ne’ebé sei kobre ba aldeia lima, hanesan aldeia Fatuk-laran, Lo’ohali, Fatuk-bitik-laran, Sadahur no Lorokida. Sistema bee moos ne’e, sei benefisia ba populasaun 1260 inklui postu saúde, eskola no igreja nomos sei instala metru kontadór unidade 210 ba benefisiáriu uma kain 210.
Enkuantu projetu konstrusaun sistema fornesimentu bee moos ne’e, sei gasta orsamentu $ 498.134,62 ho durasaun fulan neen no rekursu bee ne’ebé mak sei kanaliza ba postu-administrativu refere mai hosi bee matan Aumaen 1 no 2 ho ninia débitu kumulativu 3.8
Alende ne’e, projetu melloramentu sistema fornesimentu bee moos ne’ebé sei implementa iha postu-administrativu Cailaco, munisípiu Bobonaro nian, mak sei kobre ba Cailaco Villa no suku Meligo, aldeia Liabote. Sistema bee moos ne’e, sei benefisia ba populasaun 1950 inklui postu saúde, eskola no igreja nomos sei instala metru kontadór unidade 325 ba benefisiáriu uma kain 325.
Enkuantu projetu konstrusaun sistema fornesimentu bee moos ne’e, sei gasta orsamentu $ 242.622,53 ho durasaun fulan neen no rekursu bee ne’ebé mak sei kanaliza ba postu-administrativu Cailaco, mai hosi bee matan Boro-laran ho ninia volume 6Lps.
Fahe ba Sosial Media:
