Díli, 05/12/2022, Prezidente Komisaun Ezekutiva (K.E) Bee Timor-Leste, Empreza Públika (BTL, E.P) Eng. Carlos Peloi dos Reis asina kontratu ho kompañia Jufado Unipessoal Lda kona-bá projetu melloramentu sistema fornesimentu bee moos, ne’ebé sei implementa ba iha Suai Villa, munisípiu Covalima. Seremónia asina kontratu ne’e, realiza iha salaun enkontru, edifísiu sentrál BTL, E.P, Caicoli.
Iha entrevista Prezidente K.E BTL, E.P hatete ho implementasaun projetu ne’e komunidade sira iha suku tolu ne’e bele asesu ona ba bee moos.
“Ohin loron ita asina kontratu ida ho ita nia parseiru kompañia lokál hodi bele halo servisu melloramentu sistema bee moos iha Suai Villa, liu-liu iha suku tolu, hanesan suku Debos, Suai Loro no Suai Camnasa, ita espera ho ida ne’e, ita nia komunidade iha suku tolu ne’e, kuaze uma kain rihun ida resin bele iha oportunidade hodi bele asesu ba bee moos”, dehan Prezidente K.E BTL, E.P
Atu labele prejudika projetu fíziku iha terrenu, Ezekutivu husu ba parte hotu hanesan autoridade lokál no komunidade koopera, hodi apoia BTL, E.P no kompañia manan na’in, atu implementasaun projetu fíziku iha terrenu bele finaliza tuir tempu ne’ebé determina ona iha kontratu.
Alende ne’e, Prezidente K.E BTL, E.P mos husu ba kompañia manan na’in, atu kumpri regras ne’ebé esbelese ona, katak implementa projetu fíziku tuir termu kontratu nomos tenke garante kualidade projetu ne’e rasik, nune’e komunidade sira iha fatin refere bele utiliza ba tempu naruk.
Iha fatin hanesan, Diretora kompañia Jufado Unipessoal Lda, Delfina Amaral Lopes promote, sira prontu atu ezekuta servisu refere, hodi finaliza tuir dezeñu no tempu ne’ebé estabelese ona iha kontratu laran.
Akresenta iha tempu badak kompañia sei hahú projetu fíziku, maibé molok inisia projetu refere, kompañia rasik sei prepara uluk materiál ne’ebé ho kualidade, maibé ida ne’e la difikulta kompañia atu implementa projetu ne’e, kompañia nafatin prontu atu implementa projetu refere.
Entretantu projetu melloramentu sistema fornesimentu bee moos ne’e, sei implementa iha postu-administrativu Suai Villa, munisípiu Covalima, ne’ebé sei kobre ba suku tolu, hanesan suku Debos, Loro no Camnasa. Sistema bee moos ne’e, sei benefisia ba populasaun 7500 inklui edifísiu administrasaun públika, ospitál referénsia Suai, eskola, igreja, loja nomos edifísiu sira seluk ne’ebé eziste iha Suai Villa. Nune’e mos sistema bee mos ne’e sei transforma ba sistema urbana, iha ne’ebé sei instala mos metru kontadór unidade 1500 ba benefisiáriu sira.
Enkuantu projetu melloramentu sistema fornesimentu bee moos ne’e, sei gasta orsamentu $ 839,334.8 ho durasaun fulan neen no rekursu bee ne’ebé mak sei kanaliza ba Suai Villa mai hosi bee matan Ladi no Sukabi-Laran, ne’ebé sei halo perfurasaun ba rekursu bee ne’e ho kapasidade kada posu 12 Lps, maiibé bomba sei halo operasaun troka malu. No sei halo instalasaun ba kanu transmisaun ho distánsia metru 2255 (2255m) nomos kanu distribuisaun ho distánsia kilómetru 22.672. (22.672km).
Fahe ba Sosial Media:
