Lautém, 05/02/2025, Vise-Prezidente Komisaun Ezekutiva BTL, E.P, ba Asuntu Tékniku, Sr. José Filipe Ximenes Smith, Vise-Prezidente Komisaun Ezekutiva BTL, E.P, ba Asuntu Korporativu, Sr. Manuel Tomás Amaral de Carvalho, akompana Diretór DEI BTL, E.P, João Cardoso, Diretór O&M BTL, E.P, hala'o Reuniaun ho Reprezentante Prezidente Autoridade Munisípiu Lautém, Administradór Postu Administrativu Lautém,
Xefe Suku no entidade sira seluk, hodi informa kona-bá projetu melloramentu sistema bee, ne'ebé maka sei implementa iha tinan ne'e, iha postu administrativu Lautém.
Iha intervensaun Administradór Postu Administrativu Lautém, Anacleto Fernandes Xavier hatete, relasiona ho projetu melloramentu sistema bee, ne'ebé atu implementa iha Lautém, hanesan autoridade máximu iha postu ne'e laiha objesaun ba ida ne'e, maibé ho esperansa bo'ot hakarak kontribui no kopera hamutuk, hodi mellora sistema bee ida ne'e, bele fo benfisiu ba populasaun sira.
Iha fatin hanesan, Komandante Eskudra PNTL Postu Administrativu Lautém, Orlando da Costa informa, nu'udar autoridade seguransa ba Eatadu no Povu ida ne'e, prontu halo akompanamentu hodi asegura projetu ne'e too remata.
Komandante Eskudra ne'e hatutan, wainhira komunidade ka individu balun la satisfeitu ho prosesu implementasaun projetu ida ne'e, bele halo keixa tuir prosesu dalan legál, maibé labele halo impedimentu no estraga fasilidade sira, tamba ne'e konsidera krime.
Vise-Prezidente KE BTL, E.P, ba Asuntu Korporativu hatete, problema sosiál sai fatór prinsipal, hodi implika ba servisu projetu sira, ne'ebé BTL, E.P implementa iha postu administrativu no Suku sira, ne'ebé dala barak ema individu balun sempre halo impedimentu, hodi halo obra ne'e la finaliza tuir kontratu, ne'ebé BTL, E.P ho kompania implementador sira trasa.
Ho kestaun problema sosiál ne'e maka durante mandatu Ezekutivu anterior, inaugura projetu haat no restante la konsege finaliza, tan ne'e, Komisaun Ezekutiva dadaun ne'e halo hela esforsu tomak, monitoriza projetu hotu, nune'e rezolve hodi fo biban ba kompania sira bele aselera servisu iha tempu badak nia laran.
Vise-Prezidente KE BTL, E.P, ba Asuntu Tékniku informa, objetivu hosi sorumutu ne'e, hakarak informa ba Autoridade sira, hodi bele intende prosesu no atu bele kopera servisu hamutuk hodi nune'e labele akontese problema sosiál iha terrenu.
"Hanesan ita hotu hatene, liu hosi rezolusaun governu , fo kompeténsia ka poder ba autoridade lokál sira, bele halo akompanamentu ba kualker atividade governu, ne'ebé mai lao iha baze, iha responsabilidade tomak atu asegura no sai vizilansia máximu, nune'e projetu bele finaliza tuir termu kontratu, ne'ebé estabele ona".
Ezekutivu ne'e re-afirma, ba projetu ida ne'e la'o ho susesu, BTL, E.P mesak labele, maibé servisu hamutuk ho autoridade lokál no komunidade sira, obra ne'e sei hatudu rezultadu pozitivu.
"Tamba sa maka ita persija halo melloramentu ba sistema bee ida ne'e, konsidera importante no pertinente tebes, tamba komunidade sira sofre ba bee moos maka estadu liu hosi BTL, E.P iha obrigasaun tomak, hodi tau matan duni ba povu iha munisípiu too Aldeia".
Hafoin reuniaun ne'e, ekipa delegasaun hamutuk ho autoridade sira, kontinua hakat ba bee matan, hodi hare rekursu bee, ne'ebé atu kanaliza ba komunidade sira.
Fahe ba Sosial Media:
