Lautém, 03/10/2023. Koordenadór Bee Timor-Leste, Empreza Públika (BTL, E.P) munisípiu Lautém ho ekipa, akompaña S.E Sekretáriu Estadu Eletrisidade Bee no Saneamentu (SEEAS, sigla portués), Santos Noronha ho ekipa nomos Sekretáriu Estadu Florestas (SEF) hala'o vizita, ba praia Valu Sere no Illa Jaco, ne'ebé lokaliza iha suku Tutuala, postu-administrativu Tutuala, munisípiu Lautém.
Vizita ekipa konjunta ba fatin turístiku ne'e, ligadu ho informasaun kona-bá falta bee moos, hodi afeta direta ba balada sira ne'ebé moris iha praia Valu Sere no Illa Jaco, nune'e ho vizita refere, oinsá bele buka alternativa, atu hatan ba problema ne'e.
Vizita ne'e hala'o durante loron rua, ho objetivu hodi observa direta kondisaun jerál iha fatin turístiku no identifika bee matan ou rekursu bee, ne'ebé planeadu atu kanaliza bee ba fatin ne'e, nune'e bele fasilita balada sira, iha Illa Jaco.
Tuir planu, iha tempu badak, ekipa Institutu Petróleu no Jeolojia Institutu Públiku (IPG, I.P, sigla portugés) sei tun ba terrenu, hodi halo estudu viabilidade ba fatin hirak ne'ebé indikadu, nune'e bele halo análize no fó pareser.
Durante vizita iha praia Valu Sere no Illa Jaco, ekipa konjunta ne'e identifika rekursu bee fatin tolu, iha ne'ebé sei halo perfurasaun ida iha Illa Jaco, desalinizasaun bee ou produz tasi been ba bee no kanalizasaun bee hosi Valu Sere liuhosi tasi okos ba Illa Jaco.
Atividade vizita ba fatin turístiku rua ne'e, akompaña mos hosi Guarda Florestál nasionál no munisípiu Lautém, Administradór Tutuala, tékniku EDTL, E.P Lautém no grupu peskadór Lautém nian. Durante iha terrenu, ekipa konjunta ne'e mos kuru no lalin bee, hodi enxe ba iha tanke, atu nune'e, bele fasilita balada sira iha fatin ne'e, hodi asesu ou hemu.
Fahe ba Sosial Media:
