๐๐ขฬ๐ฅ๐ข, ๐๐ ๐
๐๐ฏ๐๐ซ๐๐ข๐ซ๐ฎ ๐๐๐๐. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Tékniku, José Filipe Ximenes Smith hamutuk ho Jestór DAK, Ofisiál Legál ho ekipa DAK BTL, E.P, sosializa regulamentu ne’ebé abrigu iha Dekretu Lei no Diploma Ministeriál sira kona-bá tabela tarifária, proibisaun ba koneksaun ilegál no kritéria atu sai kliente BTL, E.P nian, iha aldeia Rio de Janeiro, suku Bairo-Pité, Postu-administrativu Dom Aleixo, Munisípiu Díli.
Iha atividade sosializasaun ne’e, BTL, E.P partilla informasaun detalla Dekretu Lei nú. 41/2020 loron 25 fulan Setembru ne’ebé ko’alia kona-bá “Kriasaun Bee Timor-Leste, Empreza Públika (BTL, E.P), Dekretu Lei nú. 4/2004 loron 11 fulan Fevereiru, kona-bá “Aprova Rejime Fornesimentu Bee ba Konsumu Públiku”, nune’e mos Diploma Ministeriál nú. 1/2004 loron 11 fulan Fevereiru ne’ebé ko’alia kona-bá “Tabela Tarifária” no ikus liu Diploma Ministeriál nú. 1/2009 loron 5 fulan Outubru, kona-bá “Fiskalizasaun Sistema Abastesimentu Bee”.
Objetivu hosi realizasaun atividade sosializasaun ne’e, hodi partilla uluk informasaun kona-bá, knaar BTL, E.P nian no regulamentu sira ne’ebé sita ona iha leten ba abitante sira, atu nune’e sira bele entende nomos husu sira-nia kolaborasaun no apoiu, molok tékniku sira tun bá halo servisu melloramentu sistema kanalizasaun bee, iha aldeia ne’e.
Iha abertura ba atividade ne’e, Vise-Prezidente KE BTL, E.P ba Asuntu Tékniku hatete, BTL, E.P akompaña sistema bee iha aldeia ne’e antigu no balun ema mak sobu rasik, nune’e presiza hadi’a. Tanba ne’e ohin, BTL, E.P mai partilla uluk regulamentu no kritéria sira no informa uluk ba lideransa komunitária no abitante sira, hodi hetan konkordánsia no apoia, nune’e wainhira tékniku sira tun mai halo servisu iha terrenu, labele iha intervensaun ruma hosi komunidade.
Vise-Prezidente ba Asuntu Tékniku informa, BTL, E.P planeia hodi halo intervensaun liuhosi mellora sistema kanalizasaun bee iha aldeia Rio de Janeiro, katak sei desmantela koneksaun ilegál sira, hodi halo ligasaun foun nomos monta metru kontadór ba uma kain sira, nune’e bele jere ho di’ak, uza ho di’ak no uza tuir nesesidade, wainhira bee nakonu tenke taka torneira, atu nune’e ema hotu-hotu bele hetan bee hanesan.
Reprezentante Komandante Eskuadra PNTL PA Dom Aleixo, hatete, iha futuru wainhira ekipa BTL, E.P tun mai instala ona fasilidade bee iha aldeia ne’e, husu ba komunidade sira atu tau matan ba fasilidade sira ne’e, wainhira bee la sai tenke hato’o ba xefe aldeia no suku, nune’e bele informa ba BTL, E.P hodi halo intervensaun. Labele sobu estraga, tanba estraga fasilidade públika ida ne’e krime, tanba ne’e tenke asegura fasilidade públiku sira.
Antes atu termina sosializasaun ne’e, Xefe Aldeia Rio de Janeiro, husu ba abitante sira, atu hatutan informasaun sira ba komunidade sira seluk ne’ebé ohin la marka prezensa iha atividade ne’e no husu ba sira, wainhira iha ema balun ne’ebé dada bee ilegál no estraga kanu, tenke informa ba Lideransa Komunitária, labele nonok, tanba fó impaktu ba ema seluk labele hetan bee nomos bele hetan sansaun ou multa.
Xefe aldeia ne’e, rekomenda ba komunidade sira, atu evita liga bee ilegál, tanba selu tarifa bee fulan-fulan kiik no di’ak liu, kompara ho ligasaun ilegál, ne’ebé ikus mai tenke multa ho presu ne’ebé boot.
Durante iha atividade sosializasaun ne’e, lideransa suku no komunidade sira hato’o sira-nia preokupasaun kona-bá falta bee moos, rekomendasaun no susjestaun balun, BTL, E.P anota no sei haree oinsá bele halo intervensaun, hodi responde ba kestaun hirak ne’e.
Partisipa iha atividade sosializasaun ne’e, OPS, reprezentante Komandante PNTL Eskuadra Dom Aleixo, Lideransa Komunitária no abitante sira hosi aldeia Rio de Janeiro
Fahe ba Sosial Media:
