Díli, 16/02/2024, Prezidente Komisaun Ezekutiva Bee Timor-Leste, Empreza Públika (BTL, E.P) Eng. Carlos Peloi dos Reis, partisipa iha workshop nasionál kona-bá Aprezentasaun Deskobrimentu no Rekomendasaun Auditoria Sosiál ba setór Saúde, Infraestrutura Báziku, Edukasaun no Inkluzaun Sosiál” ne’ebé organiza lihosi kooperasaun servisu entre Forum ONG Timor-Leste (FONGTIL) no Instituto Camões/PFMO. No eventu ne’e rasik realiza iha Otél Timor, Díli.
Objetivu hosi eventu ne’e, hodi fó espasu ba Parseiru Implementadór Auditoria Sosiál (PIAS) FONGTIL sira bele aprezenta rezultadu hosi Deskobrimentu Auditoria Sosiál 2022-2023, atu ofisialmente entrega relatóriu finál auditoria sosiál ba governu liuhosi setór edukasaun, saúde, infraestrutura báziku no inkluzaun sosiál nomos atu governu bele tau konsiderasaun ba deskobrimentu auditoria sosiál iha planu governu nian, iha Orsamentu Jerál Estadu (OJE) foun ba tinan oin nian.
“Eventu ida ohin ne’e hanesan eventu ida ne’ebé ami atu permite ami nia membru sira, hodi bele mai fahe sira nia deskobrimentu auditoria ninian ne’ebé foku liu ba setór agrukultura, saúde, infraestrutura bázika nomos edukasaun nian. Sesaun ida ne’e, ami halo servisu hamutuk ho no Instituto Camões/PFMO hodi organiza eventu ne’e, liu-liu kona-bá jestaun ba finansas públiku, entaun ami nia deskobrimentu auditoria sosiál sira pertinente tebes, hodi bele fahe ho entidade hotu-hotu, xefe suku no hanesan instituisaun públiku para bele ajuda sira nia planu, atu wainhira hahú diskute kona-bá planu orsamentu foun ba tinan oin nian, sira bele tau atensaun ba deskobrimentu sira ne’ebé ami hetan”, esplika Diretór Ezekutivu FONGTIL, Valentim da Costa Pinto.
Workshop nasionál ne’e, abertura direta hosi S.E Vise-Primeiru Ministru, Ministru Koordenadór Asuntu Sosiais no Ministru Dezenvolvimentu Rurál & Abitasaun Komunitária, Mariano Assanami Sabino no partisipa hosi entidade sira hosi instituisaun Estadu nian, parte instituto Camões no PMFO, PDHJ, parseiru dezenvolvimentu sira, Asosiasaun Halibur Defisiénsia Matan Timor-Leste (AHDMTL) no estudante hosi UNTL, UNPAZ nomos partisipante sira seluk.
Fahe ba Sosial Media:
