Díli, 17/05/2024. Jestora Rekursu Umanu Bee Timor-Leste, Empreza Públika (BTL, E.P), Joaquina Fonseca ho ekipa partisipa iha atividade Marsa Saudável ne'ebé organiza hosi MOP, molok hala'o marsa ekipa halo uluk jinástika iha Jardin B.J Habibie Bidau, hafoin kontinua hala'o Marsa Saudável ho rute hosi ponte B.J Habibie-Bidau-resintu edifísiu MOP.
Hafoin to’o iha resintu MOP, hodi kontinua kedas ho atividade Mini Bazar ne’ebé partisipa mos hosi Vise-Prezidente Komisaun Ezekutiva BTL, E.P ba Asuntu Boa Governasaun no Fortalesimentu Institusionál Sra. Elizabeth Amaral akompaña hosi Jestora no Jestór sira, iha resintu edifísiu MOP, Caicoli.
Iha atividade Mini Bazar ne’e, ekipa hosi MOP, BTL, E.P, EDTL, E.P RHTO no ekipa seluk tan prepara produtu lokál ho presu ne’ebé baratu ba vizitante sira.
Objetivu hosi atividade Jinástika, Marsa Saudável no Mini Bazar ne'e, hodi komemora Loron Restaurasaun Independénsia Repúblika Demokrátika Timor-Leste (RDTL) 20 Maiu 2024 nian ba Dala XXII. Enkuantu antes ne’e, realiza uluk ona atividade balun hanesan workshop no doasaun ran.
Partisipa iha Marsa Saudável ne'e, mai hosi BTL, E.P, MOP, ANAS, I.P, EDTL, E.P, ANE, I.P, MAE no CNE. Atividade refere hetan seguransa hosi parte seguransa Polísia Tranzitu (Poltranz) munisípiu Díli.
Fahe ba Sosial Media:
