Ermera, 16/05/2023. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P), ba Asuntu Sistema Bee, Saneamentu no Drenajen, Sr. Gustavo, akompaña hosi BTL, E.P Ermera, partisipa iha seremónia lansamentu fatuk dahuluk ba projetu reabilitasaun hosi Postu-administrativu Letefoho bá Postu-administrativu Hatubuilico, ne'ebé lansa direta hosi S.E Ministru Obras Públikas (MOP), Eng. Abel Pires da Silva, akompaña hosi Prezidente Autoridade Ermera no Administradór Ainaro, iha Ermera.
Ministru Obras Públikas (MOP), Abel Pires da Silva, hatete reabilitasaun estrada ligasaun Letefoho ba Hatobuilico ne'e esensiál tebes, hodi tulun abitante sira bele movimentu bá mai atu hala'o sira nia atividade oin-oin.
"Estrada ida ne'e sei fasilita inan aman sira ne'ebé maka halo vida agrikultura, negósiu, sosiál, kulturál entre sira ba mai," hatete MOP
Iha fatin hanesan, Reprezentante Banku Mundiál TL, Maria Isabel hato'o parabéns ba Governu no timor oan hotu, liu-liu ba populasaun hosi Ermera no Ainaro. Tanba liuhosi reabilitasaun estrada ida ne'e bele benefisia no halo mudansa ba populasaun nia moris.
"Banku Mundiál nia mehi mak atu iha mundu ne'ebé laiha ema ida mak moris iha mukit ou pobreza nia laran. No dezenvolvimentu infrastrutura sai hanesan instrumentu forte ida ne'ebé mak ita bele utiliza hodi hamenus mukit ou pobreza, hasa'e rendimentu no ba dezenvolvimentu ekonomia. Ha'u sente orgullu no nota katak, liuhosi projetu estrada ida ne'e, bele aumenta asesu komunidade nian ba merkadu no servisu báziku prinsipál sira, nune'e bele hadi'a kondisaun moris ema timor nian nomos fornese benefísiu ba setór sira seluk hanesan turizmu no agrikultura," dehan Reprezentante Banku Mundiál iha TL.
Iha biban ne'e, Prezidente Autoridade Munisípiu Ermera, Eusébio Salsinha, lori povu Ermera nia naran hato'o profundu agradesimentu ba MOP (governu), ne'ebé atentu nafatin, firme desidu, hodi bele dezenvolve no alkansa prosesu dezenvolvimentu iha setór infraestrutura, liu-liu iha área estrada, bee moos no aspeitu oi-oin.
Molok hatur fatuk dahuluk, lia na'in sira halo uluk tradisaun tuir kultura timor nian, liu-liu tradisaun Ermera nian no hetan mos bensaun hosi Amu Vigáriu Parókia Letefoho nian.
Projetu reabilitasaun estrada ligasaun hosi Hatubuilico ba Letefoho ne’e, ezekuta hosi kompañia China Civil Engineering Construction Corporation (CCECC), ho distánsia kilómetru 18 (18km). No projetu refere finansia hosi orsamentu empréstimu hosi Banku Mundiál nian, hamutuk $ 25,540,405.33. Alende ne'e, durasaun tempu ba projetu reabilitasaun estrada ne'e fulan 22 (tinan rua).
Fahe ba Sosial Media:
