Manatuto, 16/06/2023. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P), ba Asuntu Sistema Bee, Saneamentu no Drenajen, Sr. Gustavo, akompaña hosi Koordenadór BTL, E.P Manatuto, partisipa iha seremónia lansamentu fatuk dahuluk ba projetu reabilitasaun estrada hosi Obrato ba postu-administrativu Laclo, munisípiu Manatuto, ne'ebé lansa direta hosi S.E Ministru Obras Públikas (MOP), Eng. Abel Pires da Silva, akompaña hosi Administradór Munisípiu Manatuto, Administradór hosi Postu-Administrativu sira, Amu Pároku, parte seguransa PNTL, komunidade no konvidadus sira seluk.
Ministru Obras Públikas (MOP), Abel Pires da Silva, agradese ba parte hotu nia apoiu durante ne’e to’o iha faze lansamentu nian no nafatin husu komunidade sira nia tulun atu nune’e bele finaliza obra fíziku, hodi fasilita populasaun sira atu hala’o sira nia atividade.
“Agredese ba ekipa tékniku sira hosi parte hotu tanba sira nia apoiu tomak mak ohin ita bele halo lansamentu. Ba inan aman sira no veteranus sira, tanba ita boot sira nia luta mak ohin ita halo dezenvolvimentu, tanba ne’e husu atu apoia projetu importante ida ne’e, tanba estrada ida ne’e ba ita hotu, ba povu tomak, oinsá atu sira bele halo sira nia atividade negósiu, sosiál, kulturál”, dehan MOP
Iha biban ne'e, Administradór Postu-Administrativu Laclo, lori povu Laclo nia naran hato'o profundu agradesimentu ba VIII Governu Konstitusionál nia esforsu hotu, liu-liu ba MOP ho subordinadu sira hotu hahú hosi inísiu to’o faze lansamentu nian. Autoridade ne’e mos husu ba veteranus Laclo, lideransa suku no aldeia, juventude no komunidade Laclo atu hamutuk lolon liman ba malu, hodi garante no asesgura funsionamentu ba projetu konstrusaun estrada iha Laclo no Laclo Villa.
Iha fatin hanesan, Administradór Munisípiu Manatuto, Bernardo Lopes hatete liuhosi hosi reabilitasaun estrada ne’e bele tulun populasaun Laclo, hodi transporta sira nia produtu ba merkadu
“Istória foun ida iha munisípiu Manatuto, ita hamutuk hala’o lansamentu fatuk dahuluk ba reabilitasaun estrada PA Laclo, hodi bele liga kapitál munisípiu Manatuto ba Laclo. Hanesan ita hotu hanesan infraestrutura báziku ida importante los mak estrada no estrada ohin loron mak bele determina dezenvolvimentu iha setór hotu-hotu, liu-liu atu dezenvolve setór ekonómiku ne’ebé sai hanesan setór vital ida ba ema nia vida moris, ho estrada ne’e mak bele liga fatin ida ba fatin seluk, hosi kapitál munisípiu, postu-administrativu no suku to’o aldeia sira bele garante ligasaun no defisiénsia hodi transporta sasan no dudu dezenvolvimentu ekonomia nomos setór seluk ne’ebé importante ba bem estar povu nian. fiar katak ho reabilitasaun estrada ida ne’e, iha futuru bele ona garante dezenvolvimentu iha setór sosioekonómika hodi bele hasa’e rendimentu populasaun nian no bele lori sira nia produtu lokál bá iha merkadu lokál no nasionál”, dehan Nia
Administradór Manatuto husu ba kompañia konstrutór no nia parseiru atu bele servisu ho responsabilidade hodi kumpre prazu ne’ebé iha nomos solisita ba parte MOP atu halo regulamentu ba monitorizasaun no fiskalizasaun hodi garante kualidade projetu estrada refere, nune’e wainhira finaliza bele uza ho durasaun tempu ne’ebé naruk. Autoridade mos promete sei fó apoiu tomak hodi garante servisu fíziku iha terrenu.
Molok hatur fatuk dahuluk, halo orasaun no hetan mos bensaun hosi Amu Pároku, Parókia Santo António nian.
Projetu reabilitasaun estrada Laclo, hosi Obrato to’o Laclo Villa, ezekuta hosi kompañia JOVA Construção Unipessoal Lda JV ho PT Wijaya Karya (Persero) Tbk, ho distánsia kilómetru 13 (13.672km). No projetu refere nia orsamentu mai hosi Fundu Infraestrutura, hamutuk $ 6,507,608.11. Alende ne'e, durasaun tempu ba projetu reabilitasaun estrada ne'e fulan 18 (tinan rua).
Fahe ba Sosial Media:
