Díli, 27/07/2023. Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Sistema Bee, Saneamentu no Drenajen, Sr. Gustavo da Cruz, partisipa iha enkontru koordenasaun ho Sekretáriu Estadu Eletrisidade, Bee no Saneamentu (SEEAS, sigla portugés), S.E Santos Noronha, Sekretáriu Estadu ba Asuntu Toponímia no Organizasaun Urbana, S.E Germano Santa Brites Dias, Prezidente KE EDTL, E.P, Sr. Paulo da Silva, Prezidente Autoridade Munisípiu Díli (PAM-Díli), Sra. Guilhermina Saldanha, Xefe Gabinete SEEAS Sr. Júlio Gonçalves no entidade relevante sira seluk. Reuniaun ne’e realiza iha edifísiu sentrál EDTL, E.P, Caicoli, Díli.
Enkontru ne’e, hodi ko’alia kona-bá asuntu lubuk ida ne’ebé durante ne’e públiku sira kestiona ligadu ho kestaun lixu, fiu eletrisidade sira ne’ebé monu iha fatin públiku nomos problema bee moos, iha kapitál Díli. Tanba ne’e ohin deskute hamutuk, atu nune’e bele reforsa liu tan servisu integradu entre liña ministeriál sira, hodi bele rezolve problema hirak ne’e.
Relasiona ho komunidade barak iha kapitál Díli ne’ebé mak konsumu bee la ijiene S.E Sekretáriu Estadu Eletrisidade, Bee no Saneamentu hatete, komunidade barak ne’ebé mak konsumu bee kontaminadu ho bee fo’er ne’e, dala barak bee ne’ebé mak komunidade sira mak halo perfurasaun rasik no ida ne’e la’ós bee ne’ebé kanaliza hosi BTL, E.P. S.E Sekretáriu Estadu mos akresenta, iha futuru sei kria regulamentu ida, hodi regula komunidade sira ne’ebé mak halo perfurasaun rasik.
“Konsumu bee ne’ebé mak la ijiene ka kontaminadu ho bee posa nian ne’e, ha’u hanoin ida ne’e perfurasaun sira ne’ebé mak komunidade sira mak halo rasik, ida ne’e la’ós kabe ba governu ka BTL, E.P mak halo, maibé ida ne’e kabe ba komunidade sira. Tanba ne’e komunidade sira mak tenke hatene sira halo perfurasaun bee ne’e besik posa kalae. Agora ba oin, ita mos sei kria regulamentu ida para haree ba asuntu ida ne’e, atu nune’e ita nia komunidade sira mos labele halo perfurasaun arbiru, tanba perfurasaun ne’e nia impaktu ambientál ladun di’ak, ne’ebé ba oin ita sei haree ba ida ne’e, ha’u sei ko’alia ho prezidente BTL, E.P hodi haree hamutuk atu estabelese regulamentu ne’e”, esplika S.E SEEAS.
Alende ne’e, ligadu ho komunidade barak halo perfurasaun rasik, ho razaun katak kanalizasaun bee hosi BTL, E.P la sufisiente. Hatan ba kestaun ne’e, S.E SEEAS akresenta, komunidade barak iha Díli mos kestiona kona-bá asuntu refere. Tanba ne’e, enkontru ohin deskute mos ba asuntu ne’e, katak iha tempu besik sei haree no identifika perfurasaun bee ne’ebé BTL, E.P halo ou finaliza ona iha kapitál Díli, atu bele ativa hotu, hodi nune’e bele fornese bee ba komunidade sira. Tanba perfurasaun lubuk ida mak seidauk iha bomba, hodi halo operasaun, nune’e seidauk bele fornese bee ho máximu ba abitante sira, maibé iha tempu badak sei haree kestaun ida ne’e.
Fahe ba Sosial Media:
