Aileu, 28/12/2023. Prezidente Komisaun Ezekutiva (KE) Bee Timor-Leste Empreza Públika (BTL, E.P), Eng. Carlos Peloi dos Reis no ekipa Project Management Unit-PMU MOP/BTL, E.P partisipa iha programa konservasaun bee no rai ho tema "Konservasaun ba Bee Matan no Asegura Erosaun", ne'ebé realiza hosi Diresaun Nasionál ba Regulamentu Bee no Saneamentu (DNRAS, sigla portugés), iha resintu eskola primária Manofoni, suku Madabeno no Tohumeta, postu-Administrativu Laulara, munisípiu Aileu.
Konsidera katak bee nudár nesesidade fundamentál no esensiál, tanba ne’e DNRAS realiza atividade konservasaun bee no rai, liuhosi kuda ai-horis ou ai-oan sira, iha suku Madabeno no Tohumeta, hodi asegura rekursu bee iha bee matan sira nomos rekursu bee iha kaptasaun Tohumeta ne’ebé durante ne’e hodi fornese ona bee ba abitante sira iha kapitál Díli. Nomos atu asegura no garante kuantidade & sustentabilidade rekursu bee ba jerasaun sira iha futuru no evita rai monu.
Iha biban ne’e, entrega mos kamizola ba entidade no abitante balun ne’ebé partisipa sira iha programa ne’e no kontinua kedas ho atividade kuda ai-horis ou ai-oan, iha resintu eskola primária Manofoni no iha parte lokraik ekipa DNRAS nafatin kuda ai-oan ba fatin ne’ebé identifikadu, iha suku rua ne’e.
Partisipa iha atividade ne’e, Administradór munisípiu Aileu, Administradór postu-administrativu Laulara, lideransa komunitária, parte igreja, PNTL munisípiu Aileu, UNDP, ekipa MOP, SEEAS no komunidade hosi suku Madabeno no Tohumeta.
Fahe ba Sosial Media:
