Díli, 21/11/2024. Vise-Prezidente Komisaun Ezekutivu (KE) Bee Timor-Leste, Empreza Públika (BTL, E.P) ba Asuntu Servisu Korporativu, Sra. Elizabeth Amaral akompaña hosi Jestora Kontabilidade no Finansas BTL, E.P nian, partisipa iha atividade Audiénsia Públika kona-bá Padraun Kontabilidade Setór Públiku no Setór Privadu, iha salaun auditóriu Kay Rala Xanana Gusmão, Ministériu Finansas (MF), Aitarak-Laran.
Objetivu hosi atividade Audiénsia Públika ne'e, hodi halibur parte interesadu xave sira hosi órgaun no entidade oin-oin, setór públiku no privadu sira iha TL, inklui profisionál kontabilista, reprezentante hosi sosiedade sivil, akademista, instituisaun edukasaun sira iha área kontabilidade, entidade sira hosi setór bankáriu no finanseiru, entidade privadu no empreza públika sira, ho intensaun atu ajuda halo observasaun no fó opiniaun ou
sujestaun ba esbosu padraun kontabilidade ne'ebé prepara ona hosi komisaun Ministériu Finansas (MF) nian, atu nune’e, MF bele tau iha konsiderasaun hodi mellora esbosu padraun kontabilidade ne’ebé mak iha.
Entretantu padraun kontabilidade ne’e, sei aplika ba setór públiku no setór privadu sira iha TL, wainhira hetan ona aprovasaun.
Audiénsia Públika ne'e, sei hala’o durante loron rua, hahú hosi loron 21 to’o 22 fulan ne’e, no partisipa hosi entidade oin-oin hosi órgaun estadu nia, sosiedade sivil, akademista, empreza públiku no privadu sira nomos profisionál kontabilista sira.
Fahe ba Sosial Media:
