𝐀𝐭𝐚𝐮́𝐫𝐨, 𝟐𝟕 𝐌𝐚𝐫𝐬𝐮 𝟐𝟎𝟐𝟔. Diretór DOM BTL, E.P, Aleixo dos Santos, akompaña hosi Ofisiál DOM no Jestór Produsaun partisipa iha aprezentasaun hosi kompañia DSL hosi Xina, kona-bá planu instalasaun sistema desalinizasaun, iha Postu-administrativu Ataúro, Munisípiu Díli.
Ohin, kompañia DSL halo aprezentasaun hodi introduz planu instalasaun sistema desalinizasaun nomos kustu estimativa ba instalasaun sistema ne’e ba Autoridade PA Ataúro no Diretór SA-OPTASA inklui tékniku sira, hodi haree hamutuk no foti desizaun, molok implementa sistema desalinizasaun (transformasaun tasi bee ba bee moos) iha Ataúro.
Tuir planu ne'ebe kompañia ne'e aprezenta katak, wainhira sistema desalinizasaun ne'e implementa iha Ataúro, sei benefisia ba ema/konsumidór sira hamutuk 6.000 to’o 10.000, tanba sistema refere nia kapasidade to'o litru 13.000 kada oras (13.000 l/h).
Hafoin aprezentasaun ne’e, iha tempu tuir mai, tékniku sira sei halo survey kle’an ba fatin instalasaun sistema desalinizasaun nian inklui foti amostra tasi been, hodi halo teste, atu hatene kualidade tasi been, molok hakat ba faze instalasaun nian.
Partisipa iha aprezentasaun ne’e, Autoridade interinu Ataúro, Diretór SA-OPTASA, PNTL nomos tékniku sira inklui partisipante relevante sira seluk.
Fahe ba Sosial Media:
