Díli, 22/05/2025, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz, ho Vise-Prezidente KE BTL, E.P ba Asuntu Tékniku, Sr. José Filipe Ximenes Smith, akompaña hosi Diretór Administrasaun no Finansas (DAF), Diretór O&M, Jestór DAK, DCQA ho ekipa partisipa iha 7th Joint Coordination Committee (JCC) meeting kona-bá ‘’The Project for Improvement of Water Supply Management of BTL, E.P’’. 7th JCC Meeting ne’e realiza iha salaun enkontru, otél JL Villa, Fatuhada.
Objetivu hosi 7th JCC meeting ne’e, hodi atualiza progresu servisu hirak ne’ebé implementa ona durante ne’e, liuhosi kooperasaun servisu entre BTL, E.P no parseiru JICA, kona-bá monitorizasaun ba projetu no progresu hosi projetu sira, liu-liu iha parte O&M no DAK nian, inklui partilla opiniaun kona-bá problema sira ne’ebé mak akontese, atu nune’e bele hetan resposta no planu sira ba iha futuru.
Iha abertura ba 7th JCC meeting ne’e, Prezidente KE BTL, E.P hatete ohin hanesan oportunidade di’ak tebes ba hotu-hotu, atu akompaña aprezentasaun sira liga ba rezultadu apoiu hosi parseiru JICA nian ba iha setór bee, iha parte melloramentu, apoiu tékniku ba BTL, E.P nomos kapasitasaun ba rekursu umanu ne’ebé hala’o iha rai laran no rai liur. Tanba ne’e, hodi Governu Timor-Leste (TL) nia naran hato’o agradese wa’in ba Governu no povu Japaun nia apoiu mai TL liuhosi JICA.
Ezekutivu BTL, E.P akresenta, ho mudansa Country Director JICA nian, BTL, E.P iha esperansa boot katak, kooperasaun servisu ne’e bele kontinua no la’o di’ak liu tan ba futuru, hodi bele hametin instituisaun, liu-liu ezisténsia BTL, E.P iha Timor. Maske apoiu tékniku sei remata iha tinan ida ne’e, maibé hein katak, sei iha tan ajudu sira seluk, ne’ebé bele tulun TL prinsipalmente ba BTL, E.P, atu nune’e bele dezenvolve di’ak liu tan, atendimentu ba distribuisaun bee no kualidade bee, nune’e mos, atu bele ajusta sistema dijitalizasaun.
Iha 7th JCC meeting ne'e, iha mos aprezentasaun hosi BTL, E.P kona-bá "Improvement of Billing and Collection Capacity no "Improvement of Water Distribution Management Capacity" no “Improvement of Billing and Collection Capacity” enkuantu parseiru JICA aprezenta kona-bá “Key Findings of JICA DXLab Study”, “Achievement of the Project”, ”Overall Achievement Status by Project Indicators” nomos “Recommendation”. Hafoin aprezentasaun fó mos biban ba partisipante sira hodi hato’o perguntas, sujestaun no rekomendasaun ruma relasiona ho aprezentasaun ba asuntu ne’ebé mensiona iha leten, hodi hetan feedback, nune’e bele hadi’a prestasaun servisu iha futuru.
Atu termina JCC meeting ne’e, Ezekutivu BTL, E.P nafatin agradese ba ekipa hosi parseiru JICA, Country Director JICA, Sr. Fukumori nomos ba JICA DX Lab Team, apresia tebes ba servisu ne’ebé hala’o durante semana tolu nia laran, maske ho tempu ne’ebé badak, maibé bele detekta dezafiu sira. BTL, E.P anota no tau konsiderasaun ba rekomendasaun sira nomos presiza atu halo asaun, enkuantu ba progresu servisu ne’ebé iha bele mellora liu tan prestasaun servisu iha futuru, hodi tau iha planu asaun, atu nune’e iha apoiu sira tuir mai, bele avansa fali ba kestaun sira seluk ne’ebé mak anota ona iha rekomendasaun ne’e.
Partisipa iha 7th JCC meeting ne’e, DG MOP, DGREAS, DNRAS, reprezentante SEEAS BTL, E.P rasik no parseiru JICA.
Fahe ba Sosial Media:
