Díli, 22/11/2024, Prezidente Komisaun Ezekutiva (KE) Bee Timor-Leste, Empreza Públika (BTL, E.P), Sr. Gustavo da Cruz, akompaña hosi Vise-Prezidente KE BTL, E.P ba Asuntu Tékniku, Sr. José Filipe Ximenes Smith, Vise-Prezidente KE BTL, E.P ba Asuntu Korporativu, Sra. Elizabeth Amaral, Diretór Enjeñaria no Investimentu (DEI) Diretór Administrasaun no Finansas (DAF), Jestór sira no ekipa partisipa iha 6th Joint Coordination Committee (JCC) meeting kona-bá ‘’The Project for Improvement of Water Supply Management of BTL, E.P’’. 6th JCC Meeting ne’e realiza iha salaun enkontru, otél JL Villa, Fatuhada.
Objetivu hosi 6th JCC meeting ne’e, hodi atualiza progresu servisu hirak ne’ebé implementa ona durante ne’e, liuhosi kooperasaun servisu entre BTL, E.P no parseiru JICA, kona-bá monitorizasaun ba projetu no progresu hosi projetu sira, liu-liu iha parte O&M no DAK nian, inklui partilla opiniaun kona-bá problema sira ne’ebé mak akontese, atu nune’e bele hetan resposta no planu sira ba iha tinan futuru.
Iha abertura ba 6th JCC meeting ne’e, Prezidente KE BTL, E.P hodi Governu Timor-Leste (TL) no MOP nia parte inklui BTL, E.P agradese ba kooperasaun servisu entre Governu TL no Governu Japaun liuhosi parseiru JICA, ne’ebé durante ne’e apoia ona MOP liu-liu ba BTL, E.P hodi kapasita rekursu umanu, parte O&M no DAK nian no husu atu nafatin servisu hamutuk ho BTL, E.P hodi dezenvolve setór bee iha TL.
Ezekutivu BTL, E.P ne’e rekoñese katak, ho apoia parseiru JICA nian ba BTL, E.P, hodi dezenvolve setór bee iha TL, hatudu duni progresu ou iha mudansa signifikativu iha setór refere. Apoia hirak ne’e, prinsipalmente mak implementasaun projetu pilotu lubuk ida iha kapitál Díli, ne’ebé hatudu rezultadu di’ak tebes.
Iha 6th JCC meeting ne'e, iha mos aprezentasaun hosi BTL, E.P kona-bá "Improvement of Billing and Collection Capacity no "Improvement of Water Distribution Management Capacity"
enkuantu parseiru JICA aprezenta kona-bá "Overall Project Progress", Recommendation nomos Final Addresses on Completion of Assignment". Hafoin aprezentasaun fó mos biban ba partisipante sira hodi hato’o perguntas, sujestaun no rekomendasaun ruma relasiona ho aprezentasaun ba asuntu ne’ebé mensiona iha leten, hodi hetan feedback, nune’e bele hadi’a prestasaun servisu di’ak liu tan iha futuru.
Hafoin aprezentasaun, Ezekutivu BTL, E.P hatete, JCC meeting ne’e pozitivu tebes, tanba iha aprezentasaun sira, maske iha dezafiu balun, maibé iha mos progresu servisu ne’ebé signifikante tebes. Alen de ne’e, iha mos rekomendasaun balun ne’ebé presiza atu halo iha kurtu no médiu prazu. Tanba ne’e, Prezidente KE BTL, E.P husu ba Diretór no Jestór sira atu anota rekomendasaun sira, nune’e bele ajusta no realiza iha tempu tuir mai ho OJE 2025 nian.
Atu remata, Ezekutivu nafatin agradese ba parseiru JICA nomos ba péritu JICA nian, Sr. Kanesaka ne’ebé apoia BTL, E.P durante tinan rua ho balun, liga ba projetu pilotu ne’ebé implementa iha aldeia Mundo Perdido, Lemocari no Lecibutak, suku Manleuana.
Chief Representative/Country Director JICA TL Office, Sr. Ito destaka rezultadu konkretu balun ne’ebé nota hosi projetu jestaun abastesimentu bee, liuhosi asisténsia téknika hosi ekipa péritu JICA nian, projetu hirak ne’e kontribui ona ba mellora dezenvolvimentu rekursu umanu, jestaun ba kliente, monitorizasaun KPI, jestaun distribuisaun bee no operasaun inklui manutensaun ba instalasaun tratamentu bee, durante tinan tolu ikus ne’e, hahú hosi lansamentu projetu ne’e, iha tinan 2021.
Country Director JICA nafatin hato’o sira-nia prontidaun hodi kontinua servisu hamutuk ho BTL, E.P ba futuru, maibé presiza haree nia rezultadu konkretu, tanba ne’e husu atu kontinua hala’o servisu, nune’e bele hetan rezultadu ne’ebé di’ak.
Fahe ba Sosial Media:
