Manatuto, 31/10/2022, Diretór hosi Diresaun Enjeñaria no Investimentu (D.E.I) Bee Timor-Leste, Empreza Públika (BTL, E.P) Sr. Aleixo dos Santos akompaña hosi Jestór Infraestrutura no ekipa BTL, E.P munisípiu Manatuto halo monitorizasaun ba projetu Emergency Supply & Gabion Construction for Weten Transmition Pipeline, iha suku Aiteas, postu-administrativu Manatuto-Villa, munisípiu Manatuto.
Objetivu hosi monitorizasaun ne’e, hodi haree direta prosesu servisu fíziku ba projetu emerjénsia iha bee matan Weten ne’e, atu nune’e bele garante kualidade projetu ne’e rasik.
Bee matan Weten no pipeline ne’ebé estraga ne'e, kauza hosi inundasaun ne’ebé akontese iha loron 4 fulan Abril tinan 2021 liu ba, hafoin ultrapasa prosesu lubuk ida no iha loron 5 fulan setembru tinan 2022 ne’e, kompañia hahú ona implementa obra refere no konstrusaun fíziku daudaun ne’e, atinji ona pursentu 12.02 (12.02%). Enkuantu implementasaun obra ne’e rasik ho durasaun tempu fulan neen.
Entretantu orsamentu ne’ebé hodi finansia ba projetu Emergency Supply & Gabion Construction for Weten Transmition Pipeline iha Manatuto ne’e, aloka hosi Fundus Infraestrutura (FI) ho montante $ 127,786.80.
Fahe ba Sosial Media:
