Manatuto, 14/11/2022, Ekipa Bee Timor-Leste, Empreza Públika (BTL, E.P) munisípiu Manatuto kompostu hosi Tékniku Operadór (T.O) no Ofisiál Apoiu Kliente (O.A.K) tun ba terrenu hodi lee metru kontadór, iha suku ne’ebé lokaliza iha postu-administrativu Manatuto Villa, munisípiu Manatuto.
Koordenadór BTL, E.P munisípiu Manatuto informa, leitór sira lee metru kontadór iha suku haat hanesan suku Sau, Ma’abat, Ailili no Aiteas, hafoin lee hotu, ekipa téknika hato’o kedas ba kliente sira, kona-bá presu bee, tuir uzu ou gastu bee, durante fulan ida nian ba kliente no kliente sira sei bá halo pagamentu ou selu tarifa bee, iha edifísiu BTL, E.P Manatuto
Entretantu tuir regra, komsumidór sira ne’ebé asesu ona sistema kanalizasaun bee hosi BTL, E.P, iha obrigasaun atu selu tarifa bee moos, nune’e hodi kontribui reseitas ba kofre Estadu.
Alende ne’e, taxa ne’ebé kliente sira selu, liuhosi tarifa bee ne’e, hodi garante sustentabilidade ba atividade manutensaun kona-bá sistema bee moos sira ne’ebé eziste, nune’e bele garante nafatin funsionamentu sistema bee refere, hodi bele fornese ba konsumidór sira.
Fahe ba Sosial Media:
