Manatuto, 16/11/2022, Tékniku Operadór (T.O) Bee Timor-Leste, Empreza Públika (BTL, E.P) munisípiu Manatuto hamutuk ho ekipa SMASA instala bee ba fatin ne’ebé prepara hela, hodi komemora loron Proklamasaun Independénsia 28 Novembru, ne’ebé lokaliza iha aldeia Carlilu, suku Aiteas, postu-administrativu Manatuto Villa, munisípiu Manatuto.
Tékniku sira mos sei halo instalasaun bee ba sentina públika sira ne’ebé parte kompañia sira prepara iha fatin seremónia ne’e rasik, hodi fasilita komunidade sira ne’ebé sei bá partisipa iha eventu nasionál ne’e.
Tuir observasaun iha terrenu katak, atividade instalasaun bee ba fatin ne’e seida’uk remata no tékniku sira kontinua, tamba daudaun ne’e, sentina públika hirak ne’e seida’uk prontu, tamba ne’e tékniku operadór sira sei kontinua hala’o atividade instalasaun iha fatin refere.
Tuir informasaun hosi BTL, E.P munisípiu Manatuto katak, alende instalasaun bee ba fatin eventu nasionál 28 Novembro nian, iha sorin seluk, tékniku operadór sira instala mos bee ba komunidade sira ne’ebé hela besik iha fatin ne’e.
Fahe ba Sosial Media:
