Atauro, 24/09/2022, Prezidente Komisaun Ezekutiva BTL, E.P, Eng. Carlos Peloi dos Reis, Akompaña husi I Vise-Prezidente K.E BTL, E.P, II Vise-Prezidente K.E BTL, E.P, no Diretór D.E.I, lansa projetu melloramentu sistema fornesimentu bee moos, ba komunidade sira, iha Munisípiu Atauro.
Iha serimónia lansamentu ne’e, Prezidente K.E BTL, E.P hatete, hafoin Postu Administrativu Ataúro, ne’ebé transforma ba munisípiu, Primeiru Ministru, Taur Matan Ruak, orienta ba BTL, E.P atu fo preoridade ba komunidade sira iha Atauro, hodi mellora sistema bee, nune’e fasilita komunidade sira iha Atauro villa, bele asesu bee moos.
Wainhira projetu melloramentu sistema bee moos ne’e, finaliza sei harii torneira públiku, nune’e mós halo ligasaun direita ba komunidade nia uma ida-idak, hodi monta metru kontadór, atu bele kontribui selu tarifa ba Estadu.
Líder BTL, E.P husu konsumidor sira, kuidadu sistema bee, nune’e bele fo biban ba BTL, E.P, hodi bele promove fali projetu foun iha fatin seluk.
Administradór Munisípiu Atauro, Domingos Soares, agradese ba BTL, E.P, tamba bele fornese projetu sistema melloramentu ne’e, hodi bele lori bee hakbesik mai komunidade sira.
Xefe Suku Filipe Ximenes, senti kontente, tamba BTL, E.P bele hahu ona mellora sistema bee moos iha fatin ne’e, hanesan pasu ida, hodi fo moris ba povu, liu-liu kona-bá bee moos, ne’ebé sei fasilita abitante sira.
Autoridade lokál ne’e afirma katak, prontu atu akompana didi’ak prosesu melloramentu ba sistema bee moos no sistema ne’e funsiona, sei tau matan ho di’ak, hodi bele utiliza ba tempu naruk.
Projetu melloramentu sistema bee ne’e, sei gasta ho orsamentu hamutuk $ 862.781.00 ho durasaun tempu fulan neen nia laran, obra ne’e sei remata.
Enkuantu sistema melloramentu sistema fornesimentu bee moos ida ne’e, sei benefisia ba total populasaun rihun hat, atus hitu lima nulu ( 4750 ), ne’ebé pertense ba Suku tolu hanesan, Suku Villa Maumeta, Beloi no Bikeli.
Fahe ba Sosial Media:
