Ainaro, 11/10/2022, I Vise-Prezidente Komisaun Ezekutiva BTL, E.P, Gustavo da Cruz, akompaña hosi Jestór ba Peskiza, Projetu no GIS, Almeida Boavida, koordenadór BTL, E.P Ainaro ho ekipa tékniku operadór sira, hamutuk Autoridade lokál no entidade sira seluk, lansa projetu konstrusaun sistema fornesimentu bee moos, iha Maubisse Villa.
Iha serimónia lansamentu ne’e, I Vise-Prezidente K.E BTL, E.P hatete, Polítika oitavu governu konstitusionál hakarak liberta povu, oinsa komunidade sira bele asesu bee moos, iha kapitál munisípiu, Postu Administrativu, Suku no Aldeia.
I Vise-Prezidente ne’e afirma, maske tinan rua nulu liu ba, governu investe ona, maíbe seidauk bele atinji metas, tamba komunidade barak kontinua halerik ba bee moos, iha fatin-fatin.
Ho preokupasaun komunidade sira, liu-liu iha Postu Administrativu Maubisse, ne’ebé aldeia balun susar asesu ba bee moos, tamba ne’e liu husi projetu konstrusaun sistema fornesmentu ne’e, bele responde ona, ba populasaun nia nesesidade loron-loron.
I Vise-Prezidente K.E BTL, E.P, husu ba autoridade lokál no komunidade sira, atu servisu hamutuk ho kompaña implementadór no BTL, E.P, hodi bele finaliza obra ne’e, tuir termu kontratu, ne’ebé estabele ona.
Iha fatin hanesan Xefe Suku Maubisse Villa, Vulcinivio Maria Perreira mendonça, senti orgullu, tamba tinan barak komunidade balun iha suku refere, halerik ba bee moos, maibé ho projetu konstrusaun sistema bee moos ida ne’e, ajuda ona populasaun, hodi bele konsumu.
Xefe Suku ne’e akresenta, hanesan autoridade lokál, prontu kopera ho kompaña implementadór, BTL, E.P no komunidade sira, atu asegura implementasaun projetu konstrusaun sistema bee moos ida ne’e la’o ho di’ak.
Projetu konstrusaun ne’e rasik, sei gasta ho orsamentu dollar amerikanu 481,863.65, ne’ebé sei benefisia ba uma kain atus tolu (300) ho nia populasaun rihun rua resin.
Fahe ba Sosial Media:
