Baucau, 14/06/2023. Prezidente Komisaun Ezekutiva (KE) Bee Timor-Leste, Empreza Públika (BTL, E.P) Eng. Carlos Peloi dos Reis, akompaña hosi Diretór O&M BTL, E.P, Jestór Infraestrutura BTL, E.P ho ekipa, Koordenadora BTL, E.P munisípiu Baucau nomos Vogál BTL, E.P, Prezidente ANAS, I.P hamutuk ho Adjuntu Autoridade Munisípiu Baucau, Administradór Postu-Administrativu Quelicai, parte seguransa PNTL, Amu Pároku Quelicai, Lideransa Komunitária no komunidade sira lansa projetu Konstrusaun Sistema Fornesimentu Bee Moos rua, iha postu-administrativu Quelicai, munisípiu Baucau.
Iha entrevista Prezidente KE BTL, E.P hatete hafoin lansamentu ne’e, hein katak iha fulan neen nia laran, kompañia implementadór bele finaliza ona obra ne’e, atu nune’e komunidade sira iha Quelicai bele asesu ona ba bee moos. Ezekutivu BTL, E.P husu ba parte hotu atu nafatin apoia no koopera ho di’ak durante implementasaun projetu fíziku iha terrenu, nune’e kompañia manan na’in bele termina obra ne’e tuir tempu ne’ebé estabelese ona.
Ezekutivu BTL, E.P ne'e akresenta, hafoin estabelesimentu BTL, E.P iha tinan 2021, BTL, E.P konsege promove ona projetu sistema bee moos hamutuk 138 ne’ebé foku liu ba iha kapitál postu sira, la’ós ba kapitál munisípiu sira. Tanba ne’e, to’o ohin loron, BTL, E.P promove ona projetu sistema bee moos iha nível kapitál postu-administrativu 32, enkuantu kapitál postu 16 mak sistema seidauk to’o iha sira nia fatin, maibé iha informasaun katak iha tempu badak Quelicai sei estabelese tan postu rua, signifika sei aumenta tan kapitál postu rua, nune’e hamutuk 18, tanba ne’e BTL, E.P sei aumenta tan tarefa no presiza servisu nafatin, hodi promove tan projetu bee moos ba iha fatin hirak ne’ebé sistema seidauk to’o ba, atu nune’e komunidade sira iha kapitál postu 18 ne’e mos bele asesu hotu ba bee moos.
Alende ne’e, iha nível kapitál munisípiu nian hanesan, munisípiu Baucau, Viqueque, Lautém no Manufahi iha faze dezeñu detalladu (DED) nian finaliza ona no ba Baucau nian iha tempu besik sei hakat ba faze tenderizasaun nian, ba munisípiu sira seluk, ADN aprova ona no Konsellu Ministru (KM) mos aprova ona nia orsamentu adisionál nian, tanba ne’e iha tempu badak sei prepara dokumentu tender nian, hodi submete ba CNA nune’e hodi kontinua ba faze tenderizasaun nian. Enkuantu ba kapitál Díli nian DED remata ona no sei lori ba ADN hodi halo revizaun molok hakat ba faze sira tuir mai. Ida ne’e mak esforsu BTL, E.P nian durante ne’e realiza ona, hodi lori bee moos no saneamentu ba komunidade sira, maske la’o neneik maibé ezekuta ona oitoan-oitoan, BTL, E.P nia esperansa no tarjetu ou alvu mak liberta uluk iha kapitál postu sira, hafoin liberta tan iha kapitál munisípiu sira inklui haree mos ba suku no aldeia sira ne’ebé seidauk asesu ba sistema bee moos.
Iha fatin hanesan, Adjuntu Autoridade Munisípiu Baucau, Simão dos Santos Marques Pinheiro hatete hanesan reprezentante governu lokál, iha munisípiu Baucau buka atu koopera ho entidade hotu-hotu, hodi asegura kualker polítika ne’ebé mai hosi governu sentrál, liu-liu hanesan BTL, E.P daudaun ne'e atu halo servisu ne’ebé ligadu ho populasaun sira nia nesesidade, sira prontu atu asesgura.
Iha biban ne’e, Administradór postu-administrativu Quelicai, Mateus Soares Cabral promete sei koopera di’ak ho entidade hotu, nune’e implementasaun projetu refere bele hetan susesu. Administradór ne’e mos husu ba kompañia implementadór sira, atu halo servisu ho konsiénsia no responsabilidade, nune’e bele finaliza lalais projetu refere, hodi fó benefísiu ba populasaun sira iha Quelicai.
Projetu Konstrusaun Sistema Fornesimentu Bee Moos ne’ebé implementa iha postu-administrativu Quelicai, munisípiu Baucau ne’e, hamutuk rua, projetu ida ezekuta hosi kompañia Nautetu Fátima Unipessoal Lda, ho totál orsamentu $ 518,518.45. Enkuantu projetu ida seluk implementa hosi kompañia Jatono Unipessoal Lda ho kustu hamutuk $ 244,630.31.
Projetu rua ne’e ho durasaun tempu fulan neen no bee ne'ebé sei kanaliza mai Quelicai ho sistema gravitasaun, alende ne’e sistema refere sei tranforma ba sistema urbana, nune’e sei instala mos metru kontadór ba uma kain sira. Projetu sistema bee moos rua ne’e sei benefisia ba populasaun sira iha Quelicai Villa no sei fornese mos bee ba instituisaun estadu sira ne’ebé eziste iha Quelicai.
Fahe ba Sosial Media:
