Díli, 11/05/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Eng. Carlos Peloi dos Reis akompña hosi Vise-Prezidente KE BTL, E.P ba Asuntu Boa Governasaun no Fortalesimentu Institusionál, Sra. Elizabeth Amaral, Diretór DEI, Jestór RP & GIS, Jestór Infraestrutura no Legál ho ekipa, asina kontratu ho kompañia Haksolok (HJM) Unipessoal Lda, kona-bá implementasaun Projetu Konstrusaun Sistema Fornesimentu Bee Moos ba iha postu-administrativu Fatuberliu, munisípiu Manufahi-01. Seremónia asina kontratu ne’e, realiza iha salaun enkontru, edifísiu sentrál BTL, E.P, Caicoli.
Iha entrevista Prezidente KE BTL, E.P hatete, BTL, E.P kontrata kompañia ne’e hodi kanaliza bee ba Fatuberliu, hein katak iha tempu badak kompañia implementadór bele mobiliza rekursu hodi hahú ona servisu fíziku iha terrenu, maibé presiza garante mos kualidade projetu no tenke prepara materiál tuir espesifikasaun ne’ebé sita ona iha dezeñu laran.
“Ohin ita selebra kontratu ho ita nia parseiru ida ou kompañia Haksolo, para bele ajuda ita halo servisu iha kapitál postu Fatuberliu nian. Projetu ida ne’e sei benefisia ita nia maluk sira iha suku tolu, iha área ne’ebá, maibé la’ós ne’e de’it, sei fornese mos bee bai ta nia fatin públiku sira hanesan sentru saúde, igreja, eskola nomos administrasaun ninian. Espera katak ohin ita selebra kontratu ida ne’e, iha tempu badak ita nia parseiru (kompañia) bele mobiliza ona sira nia rekursu ema, sasan para bele halo servisu iha tempu badak”, hatete Ezekutivu BTL, E.P
Atu garante kualidade projetu refere no halo kontrolu ba materiál konstrusaun nian, inklui rezolve kestaun téknika sira, BTL, E.P mos sei destaka tékniku ou enjeñeiru nain rua, hodi akompaña servisu fíziku iha terrenu to'o projetu ne’e remata. Alende ne’e, BTL, E.P mos iha ekipa ida hosi Departamentu Infraestrutura, sei halo monitorizasaun ho regulár ba projetu hirak ne’e.
Iha fatin hanesan, Diretór Kompañia Haksolok (HJM) Unipessoal Lda, Helder Viera, agradese ba VIII Governu Konstitusionál ne’ebé liuhosi BTL, E.P hodi depozita konfiansa tomak ba kompañia hodi implementa projetu bee moos ne’e. Diretór ne’e mos promete sei kumpri regras ne’ebé estabelese ona iha kontratu laran no sei garante kualidade projetu ne’e rasik.
“Nudár kompañia Haksolok ne’ebé mak hetan fiar hosi VIII Governu Konstitusionál ne’ebé mak liuhosi BTL, E.P hodi fó konfiansa ba kompañia Haksolok sai vensedór ba projetu ida ne’e. projetu ida ne’e, ami liuhosi prosesu naruk ida, no fim ohin selebra kontratu ida ne’e, kompañia sei halo obra ida ne’ebé mak ho kualidade hanesan ohin hakerek ona iha kontratu laran katak, tenke tuir tempu ne’ebé mak BTL, E.P fó nomos kualidade sasan ne’ebé mak antes implementa tenke koodena di’ak ho ekipa tékniku sira, ida ne’e hanesan pontu prinsipál iha akordu laran. Nudár kompañia timoroan agradese tebes ba konfiansa ida ne’e, ha’u fiar katak obra ne’e, ami sei halo no termina tuir tempu ne’ebé mak BTL, E.P fó. Ha’u fiar katak obra sei la’o ho di’ak, tuir standar (padraun) ne’ebé mak BTL, E.P fó. Agora asina kontratu ami bele hahú ona”, hatete nia.
Alende ne’e, Administradór Postu-Administradór Fatuberliu, Gil Teófilo Amaral hatete durante tinan barak komunidade sira preokupa tebes ba bee moos, maibé ohin bele responde ona komunidade sira nia preokupasaun hirak ne’e, liuhosi asina kontratu ho kompañia, hodi dada bee ba populasaun sira iha suku tolu, postu-administrativu Fatuberliu.
“Ami nia povu sira tinan barak halerik ba bee moos, Fatuberliu provizoriamente tinan naruk ne’e konsumu bee posu, tanba ne’e agradese ba VIII Governu Konstitusionál, bele halo ona perfurasaun para nune’e ha’u nia povu sira bele asesu ona ba torneira. Tanba ne’e, ami koopera hahú kedas hosi inísiu, ami nia koordenasaun antes ne’e halo konsultasaun nian. Ohin ami ho ami nia xefe suku fatin tolu mai iha ne’e, hodi asina kontratu, tanba ne’e ha’u apresia tebes no marka prezensa iha ne’e ba enkontru ida ohin, para nune’e ba futuru ha’u nia povu ou ha’u nia komunidade em jerál, ita nia komunidade sira bele asesu ona bee ho saudavel,” hatete Administradór PA Fatuberliu.
Iha biban ne’e, Xefe Suku Fatukahi, Moises Acácio da Costa Pinto hatete antes ne’e komunidade sira iha suku tolu ne’e, asesu de’it bee posu, hein katak ho kanalizasaun sistema bee moos refere, bele fasilita no hakmaan ona komunidade sira nia sofrimentu liu-liu ba bee moos.
“Hanesan lideransa komunitáriu, hosi suku tolu, Klakuk, Fatukahi no Kaikasa agradese, tanba ita nia inan aman sira iha baze, liu-liu iha rurais, ita ko’alia kona-bá bee ne’e hanesan nesesidade báziku, bee parte hosi direitu umanu ne’ebé Timor-Leste (TL) ratifika ona konvensaun ne’e, entaun presiza tau iha asaun. Entaun asaun mak halo daudaun ne’e ohin ita hotu marka prezensa iha fatin ida ne’e, katak hafoin koordenasaun tinan barak ba kotuk, nomos halo perfurasaun iha suku Klakuk, realidade ohin ita bele konsentra iha ne’e, para oinsá ita bele hanahas liuhosi kompañia balun, ne’ebé mak hetan dalan hosi governu depois bele aplika kanalizasaun bee moos ba ita nia inan aman sira iha baze. Tanba antes ne’e, bee ne’ebé maki ta asesu barak liu bee posu, iha suku Klakuk no Kaikasa ne’e, ke’e de’it bee posu kuaze 12m, entaun ho prezensa kanaliza bee ne’e, ha’u fiar katak bele hakmaan ona inan aman sira, hodi asesu ba bee moos,” dehan Xefe Suku Fatukahi.
Projetu Konstrusaun Sistema Fornesimentu Bee Moos iha P.A Fatuberliu, munisípiu Manufahi-01 ne’e, sei implementa hosi kompañia Haksolok (HJM) Unipessoal Lda. ho durasaun tempu fulan neen no orsamentu ne’ebé prevé ba projetu refere ho montante $ 666,591.79.
Projetu bee moos ne’e sei kanaliza bee hosi bee matan perfurasaun ne’ebé lokalzia iha área suku Klakuk ho débitu 18 Lps, No projetu bee moos ne’e, sei transforma ba sistema urbana, iha ne’ebé sei instala mos metru kontadór ba benefisiáriu sira. Alende ne’e, sei intalla kanu tranzmisaun ho distánsia kilómetru 11.
Enkuantu projetu ne’e rasik, sei kobre iha suku tolu hanesan suku Klakuk, Fatukahi no Kaikasa ho totál populasaun 4.554, nune’e mos sei instala metru kontadór unidade 759 ba uma kain sira, inklui sei fornese mos bee ba postu saúde, eskola no igreja.
Fahe ba Sosial Media:
