Díli, 26/04/2023, Prezidente Komisaun Ezekutiva (K.E) Bee Timor-Leste, Empreza Públika (BTL, E.P), Eng. Carlos Peloi dos Reis ne’ebé akompña hosi Vise-Prezidente KE ba Asuntu Sistema Bee, Saneamentu no Drenajen BTL, E.P, Sr. Gustavo da Cruz no Vise-Prezidente KE ba Asuntu Boa Governasaun no Fortalesimentu Institusionál BTL, E.P, Sra. Elizabeth Amaral, Diretór DOM, Jestór Infraestrutura no Legál ho ekipa, asina kontratu ho kompañia rua hanesan kompañia Celijo Star Unipessoal Lda ho Twins 2 Unipessoal Lda, kona-bá implementasaun Projetu Konstrusaun Sistema Bee Moos nomos Projetu Fornesimentu no Instalasaun Prefabricated Liner Tank ba iha postu-administrativu Laclubar, munisípiu Manatuto. Seremónia asina kontratu ne’e, realiza iha salaun enkontru, edifísiu sentrál BTL, E.P, Caicoli.
Molok selebra kontratu ho kompañia manan na’in sira, Prezidente K.E BTL, E.P husu ba sira, atu finaliza obra fíziku tuir tempu ne’ebé determina ona iha kontratu laran, maibé tenke garante mos kualidade projetu ne’e rasik, nune’e sistema refere bele dura to’o tempu naruk.
“Ami husu ba kompañia sira nafatin mantein halo servisu ho di’ak tuir kontratu ne’ebé orsida ita nain hira sei asina, ha’u espera imi lee no kompriende didi’ak kada konteudu hosi kontratu ida ne’e. Tanba kontratu ida ne’e nia modelu la hanesan ho kontratu sira uluk ne’ebé projetu ho durasaun fulan neen ka tinan ida, halo servisu soe hela no balun bele estende to’o tinan rua no tinan tolu, maibé kontratu agora la hanesan, katak imi (kompañia) estende sem razaun ka justifikasaun forte, ita sei aplika multa tanba ne’e tenke esforsu hodi halo servisu tuir tempu ne’ebé ita determina ona iha kontratu ida ne’e. Karik iha problema natureza ne’ebé ita labele kontrola, entaun tenke komunikasaun ho ami nia tékniku sira ou autoridade lokál sira atu sira bele hatene katak kompañia labele halo servisu tanba kestaun natureza, ida ne’e ita bele konsidera,” hatete Ezekutivu BTL, E.P
Ezekutivu BTL, E.P husu ba Autoridade lokál sira, atu apoiu hodi solusiona kestaun sosiál ruma ne’ebé mak akontese durante implementasaun projetu fíziku iha terrenu, nune’e labele prejudika obra fíziku iha terrenu.
“Ba Autoridade lokál husu atu kontinua apoia BTL, E.P ho kompañia sira, wainhira sira halo servisu iha terrenu, tanba ne’e kona-bá kestaun hirak ne’ebé liga ho sosiál, husu ba administradór postu, xefe aldeia no xefe suku sira bele fasilita haree ou tau matan hodi rezolve problema sosiál sira, atu nune'e labele impede kompañia sira halo servisu iha terrenu. Kestaun sira ne’ebé liga ba tékniku nian, husik kompañia no BTL, E.P mak sei rezolve, tanba ita hakarak bee ne’e bele to’o ba iha ita nia komunidade sira nia uma, hodi uza ho regulár no responsabilidade, hodi fó impaktu pozitivu ba saúde, edukasaun no ba buat hot-hotu. Tanba ne’e, nafatin husu parte hotu-hotu nia kooperasaun, atu kompañia sira bele halo servisu ho di’ak durante fulan neen nia laran, nune’e hafoin fulan neen ne’e, ita nia populasaun sira iha postu-administrativu Laclubar bele asesu ona bee ho di’ak,” dehan Prezidente K.E BTL, E.P.
Prezidente KE BTL, E.P akresenta, atu garante kualidade obra fízika, BTL, E.P mos sei destaka tékniku/enjeñeiru nain rua, hodi akompaña servisu iha terrenu to'o remata.
Iha fatin hanesan, Administradór postu-administrativu Laclubar, Francisco Soares, agradese ba VIII Governu Konstitusionál, tanba liuhosi BTL, E.P bele kontrata ona kompañia sira, hodi kanaliza bee ba iha postu-administrativu Laclubar.
“Ohin ita asiste ona asina akordu ida ho kompañia sira ne’ebé atu konstroi bee moos iha postu-administrativu Laclubar. Tanba durante tinan naruk nia laran, hahú hosi tinan 2000 to’o mai agora, komunidade sira iha ne’ebá preokupa ho bee moos, maske bee iha, maibé ita bele hatete katak uza tuir ida ne’ebé mak iha, maibé ida loloos ne’ebé mak estadu atu konstroi hodi dada bee ba komunidade sira ne’e mak foin primeira vez, tanba ne’e kompañia sira ne’ebé mak ohin manan no ohin asina ona kontratu, ita hein katak konstrusaun bee ne’e bele fó benefísiu ba komunidade sira. No tuir mai hakarak agradese ba VIII Governu tanba liuhosi nia mandatu, liuhosi BTL, E.P bele asina ona kontratu ho kompañia sira hodi dada bee moos ba komunidade sira,” dehan Administradór P.A Laclubar.
Projetu Konstrusaun Sistema Bee Moos iha P.A Laclubar ne’e, sei implementa hosi kompañia Celijo Star Unipessoal Lda no orsamentu ne’ebé sei gasta ba projetu refere ho montante $ 468,906.58 ho durasaun tempu fulan neen.
Alende ne’e, kompañia Twins 2 Unipessoal Lda, sei kaer obra kona-bá Projetu Fornesimentu no Instalasaun Prefabricated Liner Tank, ba iha postu-administrativu Laclubar, ho durasaun tempu fulan haat no orsamentu ne’ebé sei prevé ba projetu ne’e hamutuk $ 188,035.32.
Projetu bee moos ne’e ho sistema gravitasaun iha ne’ebé sei kanaliza bee hosi bee matan Leanbau ho débitu 1.1 Lps no bee matan Hatuada 2.3 Lps ne’ebé mak lokaliza iha foho Samaur, iha área suku Manelima ho elevasaun metru 1.361 (1.361m) no metru 1.417 (1.417m). No projetu bee moos ne’e, sei transforma ba sistema urbana, iha ne’ebé sei instala mos metru kontadór ba benefisiáriu sira.
Enkuantu projetu konstrusaun sistema bee moos nomos fornesimentu no instalasaun prefabricated liner tank ne’e, sei kobre iha postu-administrativu Laclubar Villa, ho uma kain 292 no totál populasaun 1.752, inklui sei fornese mos bee ba instituisaun hamutuk 13 hanesan, postu saúde, eskola, sede suku, merkadu no igreja.
Fahe ba Sosial Media:
