Lautém, 03/08/2023, Prezidente Komisaun Ezekutiva BTL, E.P, Eng. Carlos Peloi dos Reis, akompaña husi Vise-Prezidente Komisaun Ezekutiva BTL, E.P ba Asuntu Boa Governasaun & Fortalesimentu Institusionál, Elizabeth Amaral, Diretór Diresaun Engeñaria no Investimentu, Diretór Diresaun Operasaun no Manutensaun, Jestór Infraestrutura, Kordenadór BTL, E.P munisípiu Lautém ho ekipa, nune’e mos Reprezentante Sekretariu Estadu Eletrisidade Água no Saneamentu, Reprezentante Administradór Munisípiu Lautém, Administradór Postu Tutuala, Xefe Suku, PNTL, Veteranus, komunidade no partisipante sira seluk, hodi halo inaugurasaun ba projetu melloramentu sistema bee moos, ne’ebé lokaliza iha Suku Mehara, Postu Administrativu Tutuala.
Iha serimónia inaugurasaun ne’e, Prezidente Komisaun Ezekutiva BTL, E.P hatete, BTL, E.P nia funsaun maka atu lori bee ba komunidade sira iha territóriu nasionál, ne’ebé trasa ona planu ba iha kurtu prazu no longo prazu.
Ezekutivu ne’e afirma, ruir espetativa BTL, E.P katak, fim tinan ne’e ka mediu tinan oin, hakarak liberta hotu ona Postu Administrativu sira iha Timor-Leste, ne’ebé fora husi kapitál munisípiu sira, nune’e povu sira iha postu bele asesu hotu bee moos.
BTL, E.P halo levantamentu dadus ba Postu Administrativu sira hotu ona, agora iha ona balun sei iha faze aprovizionamentu, nune’e projetu 41 ital maka dadaun ne’e la’o hela (ongoing).
Alem de ne’e mos halo preparasaun ba projetu melloramentu iha kapitál munisípiu hanesan Lautém, dadaun ne’e iha ona CNA nia liman, hodi ba iha prosesu tenderizasaun, espera iha fim do ano ka inisiu tinan oin bele lansa ona projetu sira bee moos ida ne’e.
Prezidente KE BTL, E.P hatutan, BTL, E.P mos durante ne’e servisu hamutuk ho parseiru sira, hanesan ajensia internasional no mos lokál, ne’ebé fo advokasia direita ba komunidade sira, hanesan Plan Internasiona, UNICEF, CVTL no parseiru sira seluk, ne’ebé durante ne’e ajuda ka apoia hodi kanaliza bee ba komunidade sira, liu-liu iha área rurais, hanesan Suku no Aldeia, tamba ne’e kontinua ho esforsu ida ne’e, hodi bele lori bee hakbesik ba povu.
Iha intervensaun ne’e, Prezidente KE BTL, E.P, agredese ba kolaborasaun servisu komunidade, autoridade lokál, nune’e mos ba instituisaun relevante sira nia involvimentu ba prosesu melloramentu sistema bee moos, ne’ebé konsege to’o ona iha faze inaugurasaun ida ne’e.
Iha okaziaun ne’e mos Líder BTL, E.P ne’e, husu ba komunidade no autoridade lokál tau matan ba matan, atu labele tesi ai, hodi nune’e bele kontinua konserva bee, nune’e mos husu ba benefisiariu sira, atu kuidadu sira ne’ebé dadaun ne’e eziste, hodi bele fo biban ba BTL, E.P hodi hare fali komunidade sira, iha Aldeia, Suku, Postu, ne’eb’e seidauk asesu bee moos.
Iha fatin hanesan Reprezentante, Sekretariu Estadu Eletrisidade Água no Saneamentu, lee sai mensagen Sekretariu Estadu Eletrisidade Água no Saneamentu katak, objetivu ba dezenvolvimentu sustentavel maka komunidade hotu-hotu tenki asesu ba bee moos, saneamentu ne’ebé di’ak.
Xefe Suku Mehara Zemengo Neto, senti kontente tamba tinan barak nia laran komunidade Mehara, difisíl asesu ba bee moos, maibé ho projetu melloramentu ba sistema bee moos, ne’ebé kanaliza husi BTL, E.P, bele rezolve ona komunidade nia preokupasaun durante ne’e.
Autoridade lokál ne’e mos agredese ba komunidade nia kolabora servisu ho ekipa BTL, E.P no kompañia implementadór, ne’ebé ikus hatudu rezultadu pozitivu tebes, tamba ne’e hanesan autoridade lokál sei halo kontrolu ba sistema bee moos ida ne’e, hodi asegura ba tempu naruk.
Orsamentu finansia ba obra ne’e hamutuk $ 348.757,35, ne’ebé komunidade benefisia ba sistema kanalizasaun bee moos ida ne’e, uma kain 389, ne’ebé halo ligasaun direita ba kada uma kain no mos installa metru kontadór unidade 389.
Fahe ba Sosial Media:
