Bobonaro, 21/02/2025, Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Tékniku, Sr. José Filipe Ximenes Smith, Vise-Prezidente Komisaun Ezekutiva (KE) Bee Timor-Leste, Empreza Públika (BTL, E.P) ba Asuntu Korporativu, Sr. Manuel Tomás Amaral de Carvalho, akompaña hosi Diretór Diresaun Enjeñaria no Investimentu (DEI), Jestór Infraestrutura, Enjiñeiru, Koordenadór Munisípiu Bobonaro ho ekipa disemina informasaun ba autoridade lokál no komunidade sira, iha Postu Administrativu Balibo, munisípiu Bobonaro.
Atividade diseminasaun ne’e, hodi partilla informasun ba autoridade postu, xefe suku no aldeia nomos abitante Balibo, relasiona ho planu ba implementasaun projetu melloramentu sistema bee moos iha postu Balibo. Liuhosi hosi atividade ne’e, hodi rona direta preokupasaun no sujestaun sira, nune’e bele hetan konkordánsia no apoia hosi autoridade lokál no komunidade sira, molok hakat ba faze implementasaun nian, atu nune’e labele iha intervensaun ruma durante obra fíziku la’o iha terrenu.
Vise-Prezidente KE BTL, E.P ba Asuntu Tékniku, Sr. José Filipe Ximenes Smith hatete iha tempu badak BTL, E.P sei halo servisu melloramentu sistema bee moos ne’ebé sei benefisia ba populasaun sira iha Balibo Villa.
Vise-Prezidente KE BTL, E.P ba Asuntu Tékniku akresenta razaun BTL, E.P halo aproximasaun direta ho autoridade lokál no komunidade sira, tanba bazeia ba esperiénsia iha fatin balun, lansamentu projetu realiza no tama ona ba faze implementasaun nian, mosu impedimentu, nune’e atraza ezekusaun projetu fíziku iha terrenu. Tanba ne’e, molok atu implementa obra fíziku, BTL, E.P hala’o uluk sosializasaun ho komunidade no autoridade lokál sira hodi rona direta sira-nia lian, nune’e wainhira iha ona konkordánsia entre parte hotu, mak foin bele hakat ba faze implementasaun nian.
Iha biban ne’e, Ezekutivu BTL, E.P informa mos, sistema kanalziasaun ne’ebé sei implementa iha postu Balibo, katak wainhira projetu bee moos ne’e finaliza, sei monta metru kontadór ba benefisiáriu sira, nune’e hodi selu bee, maibé ho presu ne’ebé kiik, hosi kontribuisaun tarifa bee nian ne’e, hodi dezenvolve nasaun.
Vise-Prezidente KE BTL, E.P ba Asuntu Korporativu, Sr. Manuel Tomás Amaral de Carvalho informa, sistema bee ezistente iha Balibo, antes ne’e BTL, E.P mellora ona ho nia sistema rurál, maibé la kleur tan BTL, E.P sei halo fila-fali melloramentu, hodi transforma bee rurál ba sistema bee urbana, nune’e sei monta metru kontadór ba uma kain 373 ho nia popualsaun 2000-resin mak sei asesu ba bee moos refere.
Nune’e, hafoin sosializasaun ne’e no iha ona konkordánsia hosi autoridade lokál no komunidade sira, mak iha tempu besik, BTL, E.P sei selebra kontratu ho kompañia manan na’in, hein katak kompañia konstrutór ne’e bele finaliza projetu fíziku tuir tempu ne’ebé mak prevé ona iha kontratu laran.
Vise-Prezidente KE BTL, E.P ba Asuntu Korporativu husu ba autoridade lokál no lideransa komunitária sira, atu asegura projetu ne’e, ninia implementasaun iha terrenu, wainhira mosu problema sosiál ou impedimentu ruma, labele husik kompañia la’o mesak, tanba bele afeta ba ezekusaun obra fíziku. Maibé mosu problema mak laiha intervensaun ruma hosi autoridade lokál mak sei muda fali projetu bee moos ba suku seluk ne’ebé mak presiza bee. Tanba ne’e, husu ba parte hotu, liu-liu lideransa postu, suku no aldeia inklui komunidade Balibo atu informa ba sira seluk ne’ebé la marka prezensa iha sosialziasaun refere, atu nune’e sira bele fó apoia mos ba konstrusaun ne’ebé sei realiza iha tempu besik, hodi bele finaliza lalais tuir tempu ne’ebé determina ona iha termu kontratu.
Durante iha atividade diseminasaun ne’e, autoridade postu no lideransa komunitária sira apresia no hato’o mos sira-nia prontidaun, atu apoia BTL, E.P ho kompañia hodi asegura implementa projetu bee moos iha sira-nia suku no postu, alen de ne’e, sira mos konkorda atu kontribui selu tarifa bee mensalmente.
Administradór PA Balibo hato’o agradese wa’in ba BTL, E.P tanba iha tempu badak sei implementa projetu bee moos iha postu refere, ho nune’e autoridade postu ne'e husu ba xefe suku no aldeia sira, atu fó apoiu tomak ba implementasaun projetu refere, nune'e hodi dezenvolve sira-nia postu Balibo. Tanba tinan barak ona, populasaun iha postu refere sempre halerik ba bee moos, tanba ne’e, administradór hatete ho prezensa BTL, E.P nian ne’ebé atu implementa projetu bee moos iha sira-nia postu, ne’e hanesan grasa boot ida ba komunidade Balibo.
Molok atu remata atividade diseminasaun ne’e, autoridade PA Balibo xefe suku no xefe aldeia sira asina akta konkordánsia, katak sira konkorda ona no sei fó apoiu máximu ba faze konstrusaun projetu sistema bee iha Balibo.
Bazeia planu, BTL, E.P sei implementa projetu melloramentu sistema bee moos iha postu-administrativu Balibo, nune’e wainhira finaliza, sei benefisia ba uma kain 373 ho nia populasaun 2.238 no sei fornese mos bee instituisaun sira hanesan postu-saúde, igreja no eskola.
Fahe ba Sosial Media:
