Baucau, 28/10/2022, Tékniku Operadór (T.O) hosi O&M, Bee Timor-Leste, Empreza Públika (BTL, E.P) hamutuk ho traballadór Mão de Obra (MdO), halo manutensaun ou normalizasaun ba kanu distribuisaun bee ne’ebé intupidu, iha área Marabubu, Villa Nova, munisípiu Baucau.
Durante iha atividade manutensaun ne’e, tékniku sira mos detekta koneksaun bee ilegál ne’ebé komunidade balun iha área refere, nune’e prejudika komunidade seluk labele asesu ba bee, hafoin identifika ba koneksaun ilegál ne’e, tékniku sira sei halo normalizasaun hodi dezliga ligasaun ilegál hirak ne’e, atu nune’e labele prejudika ema seluk.
Alende ne’e, ekipa BTL, E.P ne’ebé kompostu hosi Ofisiál Juniór Apoiu Kliente (O.J.A.K), Tékniku Operadór (T.O) hosi Operasionál no Manutensaun (O&M), Ofisiál Administrasaun no Finansas (O.A.F) akompaña mos hosi traballadór Mão de Obra (MdO) fó karta notifikasaun ba kliente sira ne’ebé uza mákina ou sanyo hodi dada bee.
Koordenadora BTL, E.P Baucau informa, ekipa BTL, E.P hato’o karta notifikasaun ba kliente sira ne’e, tamba sira uza sanyo hodi liga direta ba kanu distribuisaun nian, ho aktu ne’e prejudika direta ema seluk labele hetan bee, tamba koneksaun ilegál ne’e, hamenus presaun bee, nune’e ema seluk ne’ebé asesu bee hosi liña distribuisaun ne’ebé hanesan ho ema ne’ebé halo koneksaun ilegál ne’e, labele asesu ba bee. Tamba ne’e, ekipa hato’o karta notifikasaun no dezliga mos kliente sira-nia sanyo.
Enkuantu bazeia ba Diploma Ministeriál nú. 4/2004 de 11 de Fevereiro, artigu 27 nú 1, alinea e, ne’ebé ko’alia kona-bá labele uza mákina ou sanyo hodi liga ilegalmente ba kanu transmisaun no distribuisaun bee. Nomos Diploma Ministeriál nú. 4/2004 de 11 de Fevereiro, iha artigu 14 nú. 1 alinea d sita mos kona-bá ligasaun ilegál.
Regras hirak ne’e, bandu atu ema labele halo ligasaun bee ho ilegalmente, tantu liuhosi uza mákina ou sanyo nomos fura ku’ak kanu transmisaun no distribuisaun nian, tamba aktu hirak ne’e, kontribui hamenus presaun bee, nune’e bee la sufisiente ba ema hotu.
Tamba ne’e, BTL, E.P nafatin husu ba komunidade sira atu koopera, hodi labele prátika bebeik aktu koneksaun bee ho ilegálmente, atu nune’e bee bele to’o ba ema ou ema hot-hotu bele asesu bee hanesan.
Fahe ba Sosial Media:
